فرید بھنڈار

(کوار گندل ٹابری دی اوس بُوٹی نال جیہڑی راتیں تازہ ساہ دیندی اے)

جیویں سدا تُوں ریتاں جائیے

چھوڑ وطن وِچ شہر وچُھنے آونی ایں،

دِن ویلے تے ساہ رُکھ سارے ای دیندے نیں

تیرا دِتا ساہ وساہ ہے

راتاں آن جوالے

مَنڈ1 چِک2 ہُٹے سریر دیہوکے3

نینہہ واس نوں پالے،

پتر مُڈھ ہے پتر پوری

پتر ہی پروار تیرا

پتر ہی چِھل سار تیرا،

تیرے تھلوچڑ پتراں اندر ساوا سمندر اُچَھلّے

ہَر ہَر ساہ دی گہر اکہر ہے ساہ دا آون جاون

دھرو دھگان دی کُوڑ ساول نوں

نینہہ نروار ست ساول اُتَھلّے،

دینہہ دا گڈیا جو مُڈھوں اُکھیڑے

کال کلا اوہ سُتی تونہیں جگاونی ایں،

جیویں سدا نی تُوں اَوڑ ویاہِیے

کیہڑے وارے جوگی پھیرا گھر گھر آ پئی پاونی ایں

1- منڈ= منڈ کے (منڈن= مالش کرن)-

2- چِک= چِک کے (چِکن= ڈرا دھمکا کے، خوار کر کے دھک کڈھن)- 3- دیہوکے= دِن دے-