''استاد جی کھوکھا چونک آسرا''
''منٹ مار بئی''
ایس سڑک دے سارے گھر میرے تکدیاں بنے نیں
پر نہ کوئی کدی بنیندا نظریں آیائے
نہ کوئی رہندا
لگدائے محل پرانے
سنگھنیاں باگاں اُچیاں فصیلاں والے پڑدے
لاہ کے سڑک تے آ گئے نیں
متاں اوہلے رہ کے بھولیاں اکھیاں نوں ننگ چھہاون والا وارا
پورا ہو گیائے
''ہن کھوکھا چونک نہ ہووے کوئی بئی''
''تھم ویکھو- ڈُھوئے تھانیداراں دے''
''گھر نیں اسمبلیاں نیں''
''بتیاں ویکھو نتھاں''
''نتھاں اجے کُھلیاں ای نہیں؟''
''کُھلیاں نیں تاں گھر پئے نیں''
''رہندا کون اے''
''صدر امریکہ''
''آجو بھاٹی یادگار دربار وغیرہ''
لما ننگا کالا پنڈا
دُھوڑ جیوں پوڈر بال نہال کے لایا
گھا دی پَٹی اُتے اُلریا مٹی پھولے
''ذرا اگے کیوں نہیں کر لیندے''
ڈریور کولوں سَنگ لکیندی رعب نال ذرا بول گئی اے بی بی
''او بیبی کیہڑے خیالے لگ گئے او
ایس خیالے لگے رہیے پھیرا کانا کر بہیے''
ڈریور سبھ نوں سنا کے آہندائے
کلینڈر باری چوں مونہہ باہر کڈھ کے ہاسا گُھٹن دا ایکشن کردائے
''ہے کوئی شرم کسے نوں توبہ''
''پلس وی ایہناں نوں نہیں پچھدی''
''ایہناں کولوں پلس کیہ لینائے''
''مستور اے''
''ایہہ وی سمجھو پڑدا ای ہوندائے''
''وچ ٹھگ وی بڑے جے ڈھیکے''
''عام بشرمی ہو گئی اے ہُن''
''اسیں آپ جسُوس پھڑائے نیں نانگے''
''او جی اینویں کیوں گل کرئیے ڈرنا چاہیدائے''
''ساڈے بزار چ شرطاں لا کے نٹھے جے کل منڈے ننگے''
''ڈرنا چاہیدائے''
''ہُن تے ممبر ننگے نٹھ پئے نیں شرطاں لا کے''
ویگن ہلی
ننگا پنڈا سدھا ہو گیائے
ہسدا چیکدا گُٹ وجیندا
اجھک اجھک کے پب دھریندا
نواں نواں جیویں ٹرنا سکھیائے
وگدیاں کاراں وچدیں لنگھدائے
''باجی سیٹ میں دینا دو آلی تُسیں اندر لنگھو''
''بال نوں چک کے اندر کر کھاں
آپے بہہ جاندی اے''
''نہیں نخرا مان سواری دا وی- نری بماری''
''جان دے کھیہہ کھان دے''
نواں نواں سِکھیا ٹُرن منیندا
جِھکن جِھکن کھیڈیندا
اوہ پار لنگھ گیائے
''ڈبلے بھاٹی یادگار دربار وغیرہ
''ایہہ وغیرہ کتھے''
''وڈی ججی
گیائے اوہ جتھے''
''جج توں ایں اجکل''
''نہیں جج اوہو ای اے- اسیں تے واجاں لاؤن والے آں باہروں – ڈبلے''
ویگن ہلدی رکدی
سنگ مرمر دیاں جالیاں والے گھر تھلیوں ہن لنگھدی اے پئی
پر کوٹھے تے ساوے سنگ مرمر دی باراں دری اے
رنگ برنگیاں شیشیاں والی
باراں دری وچ کدیں میں کوئی نہیں ڈٹھا
ہیٹھاں چٹے سنگ مرمر دیاں جالیاں پچھوں
لگدائے اکھیاں تاڑدیاں نیں
باراں دری ول اٹھدیاں نظراں نوں گِن گِن لیکھے چاڑھدیاں نیں
متاں اوہلے رہ کے لیکھا لاون والا وارا اجے نہیں پورا ہویا