میں چِیکُو تے پوپاں
چڑیا گھر جد جانے آں
تے چیکو اوتھے بھار مشین تے سَرپر چڑھدائے
جانوراں دا چارٹ وی سَرپر لیندائے
جانوراں دیاں بھاراں نال پھیر آپنا بھار میچیندائے
پھیر اوہدی میری گل بات دا رنگ ایہہ ہوندائے:
''گینڈا ببر شیر نوں چُک سکدائے؟''
''آہو''
''جرافے نوں؟''
''نہیں''
''جرافا لماں پیا ہووے تے چُک وی سکدائے''
''ہوں''
''ہاتھی ببر شیر نوں چُک تے سکدائے
پر جے لڑائی ہو جاوے تے ببر شیر اوہنوں مار تے دیوے''
''آہو''
''خیر مارن دی ہور گل ہوئی
کِیڑی چاہوے تے سُنڈ تھانیں بھاویں
ہاتھی اندر بمب وی رکھ کے آسکدی اے''
''ہوں''
''سُتے پئے جے ببر شیر تے ہاتھی دا کدیں پیر آ جائے تے''
پوپاں بھار مشین تے چڑھدی اے
پر جانوراں دا چارٹ نہیں پڑھدی
جانوراں دِیاں اکھیاں ویکھ کے دسدی اے
''ہرن دِیاں مِٹھیاں نیں
جرافے دِیاں مِٹھیاں ای نیں
سیہے دِیاں کھٹیاں نیں''
بھگیاڑ ویکھ کے میرے پِچھے لُکدی اے
''توبہ کوڑیاں، ویکھ نہیں سکدا بندہ
ایہہ باز کیوں اِکو پاسا لوکاں ساہمنے کردائے
ہَو ایہدی دوجی اکھی ہے ای نہیں
اِکو اکھی پیلی پیلی، کَوڑی اے پر وِچ افسوس وی ہے سو''
پھیر پوپاں مینوں باز دی کہانی دسدی اے:
''ایہہ اِک جنگلی باز سی
ایہدے بچے بُہتے ہو گئے تے بازن غصے ہویا کرے
گھر پیسہ کوئی نہیں میں تیری سِری پکاواں
ایہہ عرب چلا گیا
اِک عربی باتشاہ ایہنوں نوکر رکھ لیا
باتشاہ ایہدی ٹوپی لاہ کے چھڈ دیوے
ایہہ اِک دو چِڑیاں مار کے تھلے آجاوے
تے باتشاہ ایہنوں اِک چِڑی دا دو سو درہم دیوے
(اِک درہم وِچ تن رپیے ہوندے نیں اجکل
تدوں وی اینے ای ہوندے سن
ایہہ سارے پیسے آپنی بازن دے ناں گھلیا کرے
جُوٹھی بیہی منگ کے ڈنگ ٹپاوے
بازن نویں گھر وِچ رہیا کرے تے نویں نویں کپڑے پایا کرے تے
ٹی وی اگے بہہ کے نیوزے کھایا کرے
چِڑیاں وِرلیاں ہون لگ پئیاں تے اوہناں اِک صلاح بنائی
اوہناں کیہ کیتا چمڑے دِیاں سوائیاں ٹوپیاں
ساریاں پا کے اُڈ پئیاں
ایہہ مارن چڑھیا تے اوہناں نوں دِسیا ای کوئی نہ
دِسیا نہ تے اوہ ڈریاں نہ
اوہ نہ ڈریاں تاں ایہہ ڈریا
ایہہ ڈریا تے مارنہ سکیا
تھلے آیا تے باتشاہ آکھن لگا: باز میاں کہاں شکار ہمارا؟
ایس آکھیا: سَرجی،
اُپر چِڑیاں کوئی نہیں، بازاں دے بچے آگئے نیں
باتشاہ آکھن لگا: دیکھو تم نے جُھوٹھ بولا
جُھوٹھ کی اِسلامی سزا
سرِ عام ایک آنکھ نکالی جائیگی، مجبوری
باز نے ترلے مارے مینوں بجی نہ کریو سَرجی
باتشاہ آکھیا: تو نے ہمارا نمک کھایا ہے
اب ہمیں شرمندہ نہ کر
قانون کے آگے سب ایک ہیں
بس جی باز نوں کانیاں کر کے عربوں واپس کر دِتا
گھر آیا تے بازن ویکھ کے آہندی اے:
ایہہ کون اے؟
بازن دا پھیر ناں ہو گیا بازو
اِک مور نال اوہدا ویاہ ہو گیا
باز نے دنیا چھڈ دِتی
اُجاڑ چ جا بیٹھا
اجاڑوں اِک شکاری نے ایہنوں عرب ٹورن لئی پھڑیا
پر کانا ویکھ کے چڑیا گھر نوں دے گیا
اکھے خاص باز جے
میرے ناں دی پھٹی لا کے ایہنوں رکھ لو''
چڑیا گھر وِچ بھار مشین دے نال ای
اِک زور مشین وی ہے
چیکو آپنا بھار تول کے لتھا ای اے
تے چوڑیاں ہڈ کاٹھاں والے چودھری مُنڈے
زور مشین تے آگئے
وِچوں تنگ موہری دی پینٹ تے زری دے کُھسے والا ہیرو اگے ہویا:
''کیہ لینائے وئی زور لوائی''
''چار آنے''
مشین دے پِچھوں دبی جیہی واج نال ادھکھڑ کُویا
گھسی ہوئی پتلون بنین وِچ پِنجر کسیا
سِر تے کرڑ برڑا گُپھا
ہیرو چودھری کھبا ہتھ مشین تے دھر کے ہُجکا دِتا
پھیر دوہِیں ہتھیں جُٹ گیا پھیر کِھج کے چھڈ گیا
دفع کر سُو نالدیاں اوہنوں اگانہہ ٹوریا
چار آنے دے جاؤادھکھڑ بولیا
خراب مشین اے تیری
ہتھوں تُوں سانوں دے رپئیہ رپئیہ ترونہہ نوں
آپنی دبی جیہی واج نال ادھکھڑ آہندائے کوئی گل نہیں
اج خیریں گھر نہ جاسو
ہیرو چودھری مُڑیا:
تے میں تینوں گھر نہ بھیج دِیاں دو لا کے اُلیاءوڈے نوں
ادھکھڑ نیول ہار اوہدی اُگھری بانہہ نوں وینیوں نپ کے
اصلوں دبی واج نال آہندائے
کیہ لاسیں اوئے کیہنوں لاسیں
اوئے تیری مشین خراب اے پیسیاں دی کاہدی گل اے
مشین ٹھیک کر دس روپئے لے وِیہہ لے
ادھکھڑ نیولے والی پُھرتی نال مشین دے اگے آیا
اِکو جھٹکے سُوئی نوں پورا گیڑ کھوایا
آپنی تھاں تے مُڑ گیا
چودھری ٹُٹ کے مشین نوں جُٹ گیا
سُوئی کنبدی کنبدی پاءکو چکر چلی
نیولا مُڑ جھپٹ کے اگے آیا
اِکو ساہے سُوئی نوں ترے واری پورا گیڑ کھوایا
جور دا کم اے باؤجی اِک راہی بولیا
نہیں نہیں زور ولوں تے آپاں فرق نہیں کیتا
مشین نوں ہتھ تے پایا ہویاس
نِرا جور نہیں کُجھ ہور وی لگدائے باؤ جی اِک دُوجا راہی بولیا
چودھری ٹُر گئے چِیکُو میرے کن وِچ آہندائے:
''ایہدا ویٹ اوہدے کولوں ستواں حصہ اے''
دُوجے کن وِچ پوپاں آہندی اے:
''ایہدیاں اکھیاں مِٹھیاں سن، پھیر اِکدم کَوڑیاں ہوئیاں
ایسلے کھٹیاں نیں''