ڈاکٹر صاحب
تُسیں کہندے تے سو
پڑھن دا مقصد گیان
گیان پَڑاں نہیں پِڑِ جے
ایس پِڑ اندر مرن جیون اے
جِن پِڑ چھڈیا سو مویا
تُسیں کہندے سو- اسیں سندے ساں
ژونگ، فرائیڈ، ایڈلر تساں پڑھائے
اساں لمے نوٹ بنائے
چاواں پی پی دن سُتے اَتے راتاں جاگے- فرسٹ ڈویژن آ گئی
نہ آوندی تاں کدھر جاندے
انٹرویو وچ کیویں گذارہ ہوندا
پر سول سروس ڈاکٹر صاحب پَڑاں نہیں پڑِ جے
ایس پِڑ اندر مرن جیون اے- جیون مرن اے
ایہہ پڑ بندا مردا جیوندا چھڈ نہیں سکدا
اللہ بخشے ابا جی دا پتا اے تہانوں
ساڈے لئی اوہناں آپنا آپ مکایا
دنے کلر کی راتیں ٹیوشناں
لیکچرر ہوئے پروفیسر ہوئے تہاڈے نال ای
کمپی ٹیشن لئی تیاری کر لئو پُتر
کمپی ٹیشن گول بنا لئو آپنا
ڈاکٹر صاحب میں میرٹ لسٹ وچ ناں ویکھ کے آپنا آپ پچھاتا
پہلے سال اکیڈمی
رائیڈنگ ٹینس گیسٹ نائٹ جمکھانہ
کُجھ نہ پچھو
ڈَولی تہاڈی خاص الخاص شاگرد
ایتھے سانوں بندہ ای نہیں سی سمجھدی
اوتھے اکو ای فون ٹکایا آپے ای آ گئی
وختاں نال اوہنوں مگروں لاہیا
نوٹس تہاڈے اشرف نوں میں دتے سن جی
آپنا اشرف موٹا- آ گیائے اوہ وی ایس سال
اجے نہیں تہانوں ملیا؟
جیہڑیاں گھراں نوں بائیسکلاں توں باہروں لنگھدیاں تکی دا سی
اوہناں گھراں توں کاراں شامیں
لین نوں آن کھلوتیاں رہنیاں
جدھر جاؤ
بس کارڈ وکھاؤ- جو چاہو کروا لئو
آپنے لئی میں کُجھ نہیں کیتا- لوکاں دے بس کم کروائے
کیہ گل اے پر ڈاکٹر صاحب تسلی کیوں نہیں ہوندی
جیہڑی تھاں وی رہی اے پوسٹنگ
اوتھوں جو ملدائے اوہ کہندائے
لوکیں شیخ صاحب تہانوں کدے وی بُھل نہیں سکدے
ہفتے وچ اک دن عام کُھل سی
کوئی کمپلینٹ وی ہووے
موقعے تے آرڈر کرنے- آپیں جیپ تے جا وجنا
روز ہزاراں دلوں دعائیں دیندیاں جانا
کیہ گل اے پر ڈاکٹر صاحب
ایہہ بھڑکی جیہی کیوں رہندی اے دل نوں
شروع توں نہیں جی پچھلے سال دی گل اے
اتلے تاں اتلے ای ہوندے نیں
پر آپنے جیہا کوئی یار دوست یا ہیٹھلا کوئی
میرے ولوں ذرا دھیان ہٹاوے تے میرا دل کردائے
میں مٹی مونہہ وچ تُن کے ساہ گھٹ چھڈاں اوہدا
پچھلے سال دی گل اے
باسٹرڈ- میں نہ ای ویہندا کولوں اوہنوں
ہَسا سی جی جانگلی
میری کورٹ وچ پھڑیا آیا- اینویں معمولی گل سی کوئی
اوہدا وکیل اوہنوں آکھن لگا
مافی منگ اوئے سورا
اوس ہتھ جوڑ کے دندیاں کڈھ کے مافی منگی
مینوں اوہدی شکل فریبی لگی
“ایہہ ڈھڈوں مافی نہیں پیا منگدا”
“ڈھڈوں مافی منگ اوئے اگے ہو کے ہَسیا”
اوہ بدھے ہتھیں دندیاں کڈھدا نیڑے آیا
بس ڈاکٹر صاحب
تُسیں سنگھ لیندے نہ اک واری ساہ اوس جنگلی سوردا
تاں پھیر کلاس نوں فیس کدیں نہ کر سکدے
مینوں انج لگا
جے میں ڈانگاں نال ایس جنگلی سور نوں گھیر کے چِتھ وی سٹاں
تاں وی ایہدے ساہ وچوں اوہ گل کدیں نہیں جانی
گرم ہو اڑھ اوہدا گِلا ساہ
گِلا گوہا
میرے نکوں مونہوں اکھوں کنوں اندر وڑیا مینوں آکھے
“توں کون ایں”