مِلنا وی روز دا نہیں ہُن اگے وانگوں
جدوں مِلن بس ایتنا ای آہندے نیں
''دڑ وٹ بیٹھے او''
آپیں حرف نہیں مُونہوں کڈھیندے
سمجھوتی وی نہیں کریندے بُھل بُھلیکھے،
اوہا واہی شکل چروکی دھر موڈھے تے آ ویندے نیں
ادھی لکیر وی اوس تصویر چوں اُپر تھلے نہیں ہوون دیندے،
پہلی وار اج ایتنی گل ودھائی نیں
''رَولا ورھدائے پیا
چُپ دا تولیہ دھر سِر پِھردے رہندے او
گِلا ہو گیائے
سُکنے پاؤ گھڑی، اگ تے''
میں ہس پہلی وار گلکڑی پائی اے مُونہہ چُمیائے،
ہَیں، اچنبھا،
شکل اوہ واہی کِتھے گئی
صورت اندروں نِکلی عجب ہے
وٹدی پلو پل جاوے ہور دی ہور ہوئی
دم دم کتھا وی نوِیوں نویں سُناوے پئی،
جاپے گُذری ساڈی سبھ دی
نواں کرن ہُن کارا کوئی آئی اے