4
ویندی شام دی لالی اندر ویکھ شمس نوں اوہدے ساتھی
مُول نہ روئے
راول جھمرا جندل جتل مان تے سَتی
وارو واری اگانہہ ہوئے
شمس دی رَت نال پوٹے بھر کے اک دوجے دے سینے لائے
سپاہی ہٹ گئے
چپ چاپ اوہ پنجویں بوہیوں شہر دے اندر لنگھے
چپ چاپ سبھ بڈھڑے گبھرو
پچھے ٹر پئے
قلعے نگارا وجیا
چھیوے ساتھی آپ مہارے اک قطارے
ودھدے آئے
رنگ رتا رنگایا ای یار اساں اج آپے
رنگ رتڑا ہو من متڑا
اساں ساوے ڈھیر سجائے وکھائے سارے جگ نوں
جس اندر دھوں دھکھایا ولایا اوس اگ نوں
پائے چُم چُم اگ دے ہار اساں اج آپے
رنگ رتڑا ہو من متڑا
قلعیوں دغیاں توپاں
اِک اِک کر کے لوکی کِر گئے
ستی راول جندل جتل مان تے جھمرا
میں شمس میں آپے شمس گئے کہندے چھیوے ساتھی
رنگ رتڑا ہو من متڑا
رنگ رتا رنگایا ای یار تے بہنا موہرے
پاونا نینیں سُرما سُوہا ونجا چِت جھورے
رنگ رتا رنگایا ای یار پچھانے جگ سارا
حق کرڑا ہو حق نیارا
قلعیوں لَتھے لَتھے
قلعیوں لہہ پئے ہاتھی
ستی راول جندل جتل مان تے جھمرا
میں شمس میں آپے شمس گئے کہندے چھیویں ساتھی
سڑکاں اتے بھاجڑ مچ گئی
ہٹیاں والے باہروں جندرے چاڑھ کے اندر وڑ گئے
لوکی بھجدے ریستوراناں اندر لنگھے
تے اگوں روز سلاماں مارن والے بیرے دین دہائیاں لگے
رب دا ناں جے ایتھوں ٹرجاؤ
سڑکاں اُتوں ہار موتیا ویچن والے گئے ایانے
کنگھی ویچن والیاں مائیاں گئیاں
پنجویں بوہے باہر کیہ ہویا کسے نوں رہا نہ چیتے
ہُم رات دا مشک موئے دی آپنے وجودوں آون لگی
نکاں ہیٹھ رُمالاں نال وی کُجھ نہ بنیا
عطر لوینڈر پانی تھی گئے
چِھڑکن تیل دوائیاں مُکیاں
ہتھ ہتھ لمیاں سُرخیاں آئیاں
کُجھ نہیں ہویا کُجھ نہیں ہویا
پر لکھیا جو کُجھ مرضی آکھے
ہیٹھوں کاغذ کورا ہا
جیویں موریاں اپر چُونا کیریا ہووے
یار یار نوں مِلے تاں سہی
بھرا بھراواں نال مِلن تاں سہی اُچیچا
آپنے کول کھول جو ہو گیا اوکھا
ہُم رات دا سون گولیاں پھکن باجھ نہ حیلہ
دَھمی گرم حمام دا تولیہ بھجا
انج لگا جیویں قلعے نگارے گڑھکے
مفتی حمد الدین تے ساتھی ہولی ہولی
تِلّے دار اچھاڑ مخملی
چائی شمس سرہاندی آئے
بَگیاں داڑھیاں بِھجیاں
“حضرت شمس جی قطب ربانا
درد منداں کُوں دَس درمانا”