فرید بھنڈار

(پنج یار اسیں بیٹھے ہوئے آں باگ چ

بنچاں تے

ست جنے اوہ آن کھلے نیں 

سجے کھبے

آہمو ساہمنے

پِچھے

واری واری بولدے نیں)

1- اسیں آں دِن، میں سوم ہاں 

2- میں منگل

3- میں بُدھ

4- میں وِیر، جمعرات وی آکھ لؤ، یار میرے مینوں کُڑی بنا کے چھیڑدے نیں - وِیر تے وِیر ای اے

5- میں شُکر- جمعہ وی میں ای ہاں - رل پڑھو مینوں وِچ مسِیتے

6- میں سنِیچر- ہفتہ ای ہاں، فرنیچر نہیں 

7- میں اَیت- مینوں کُڑی بنا دیندے جے ایہہ سارے- چُھٹی جو دے دینا میں 

1- دسو اسانوں کیہ چاہیدا جے، جیہو جیہی آکھو پڑھائی کرا دینے آں ایتھے باہر

2- نوکری جِتھے آکھو لوا دینے آں 

3- کاروبار جیہا وی سوہندا اے تہانوں، ایتھے باہر

4- سنگ ساتھ مردانہ زنانہ،

گھنٹہ، دو گھڑیاں 

ہفتہ ورھا مہینا

5- کھیڈ جیہڑی وی آکھو میچ کھڈا دینے آں 

بوریاں بھر کے گھر وِچ نوٹ سٹا دینے آں 

6- ساڈی اِکو شرط اے

شرط کاہدی، مجبوری آکھ لؤ

اِک پل وی تہانوں چیتے ہنیرا اساں کرن نہیں دینا

7- ایہہ بن ویندائے سانوں میہنا،

پِچھلی چیتے کرا کے

بات اگلی دی پاوندا اے، ویری اساڈا

1- اَن تکیا تکا کے

2- ان سُنگھیا سُنگھا کے

3- ان چھوہیا چُھہا کے

4- ان سُنیا سُنا کے

5- ان چکھیا چکھا کے

6- جنازہ پڑھیوں بِنا ای سانوں گور لہا دیندا اے

(سارے اُچی اُچی روون لگ پئے

دھاڑاں مارن، ڈُسکن چِیکن

وِچ وِچ پِٹن،

وت اِک دم رُک کے سارے ہس پئے اکدوجے دے ہتھ تے ہتھ مار،)

1- ویکھ لیا جے تھیٹر ساڈا

2- آرٹ جیہڑا وی آکھو تہانوں ماہر کرا دینے آں 

3- ساری دُنیا تے ناں ناواں 

4- جِتنا منگو

5- لؤ، ویلا ہوندا اے پیا، اسیں ہُن چلنے آں 

6- کل، پرسوں، جو چاہوندے او ہو ویسی

7- ہر ویلے نال آں 

(اِک اِک کر کے سارے ٹُر گئے- اسیں بیٹھے آں،

شام پئی اے، ساہمنے ساڈے اِک سانولی نار آن کھلی اے)

نار- ایہہ دِن کوئی نہیں جے

ایہہ نیں ٹھیکیدار ویہار دے کسبی برُوپیئے

اِک اِک گھڑی ایہناں دِن کولوں کھوہ کے

پھڑ پھڑ سنگِھیوں 

لُٹ جھپٹ وِچ جھوکی اے

ایہناں دِیاں نہ سُنناں 

تُساں ایہناں کولوں دِن نوں ازاد کرا کے

آپ وی موکھ مناونی اے تے ویلا نواں وساونا اے

(اساں سارے اُٹھ کے اوہدے کول کھلو گئے آں 

اوہدی سانول گھنیری ہوندی جاندی اے- اکھیاں دی لَس

وِچ اپنائیت دا رس پیا لہندائے)