دونہہ گِٹھاں دی لک پُرانے کھدر دی
سجر روڈ کرائے سِر تے کُھنگیاں
آپنے نالوں لمی ڈنگوری بابے دی
نِکا ویگن چڑھیا تے میں ڈر گیا
پہلوں چڑھیا آپ ڈنگوری سانبھ کے
وت سمھال چڑھایوس انھے بابے نوں
ویگن چل پئی تے ایس کھلو جانائے
"اکھاں والیو اکھاں بڑی نیامت نیں
ہے کوئی نبی دا پیارا صدقہ جان دا"
ویگن چل پئی اوہ کوئی نہ بولیا
کنڈکٹر پیسے منگے ایس کھلو جانائے
"انھا پیو جے ماں بیمار جے ہسپتال
ہے کوئی نبی دا پیارا صدقہ جان دا"
کنڈکٹر پیسے منگے اوس پھڑا دِتے
لکدی سانبھ کے سکھنا پلہ کُنج لیا
میں روڈا سِر ٹھنگوریا رتہ کو ٹھہر کے
نہ اوہ اگوں ہسیا نہ گند بولیا
من لیا بئی تُوں جِتیا میں ہر گیا