3
شمس دوالے منڈیاں کڑیاں
نچ نچ کنیاں پانی چڑھیا
کھوجے کھتری اندر وڑ وڑ کرن وچاراں لگے
پنڈت مفتی جھولے بَھر تجویزاں مٹی
لینیں لگ گئے قلعے دے بوہے
اُمرے وُزرے جَدی پُشتی کَوڑاں بَھل کے
اِک دُوجے نال تِھندے تِھندے جُڑن صلاحیں
ہَولی ہَولی پَکیاں رپوٹاں
شمس ایجنٹ اے ویری راج دا گھلیا
چھوہر ہِن سبھ گُجھڑے فوجی
قلعے تے دھاوا کرن دا متا پکائی بیٹھا اے
ہولی ہولی اُبھربد رو نکونک ہوئی
اکو جیہیاں شکلاں والے
چٹ کپڑے سینگھے پھرن مدرسے
کیہ کرئیے جی کم جو ہویا نوکر بندے
گھرو گھریں پیادے اپڑے
آپنا پتر ورج لئو
ایہہ نابر ہے قانون دا
ایہہ دین دُنی دے امن چین دی نینہہ برباد پیا کردا اے
کل سرکار نوں سختی کرنی پئی تے ذمہ تہاڈا ہو سی
شاعر گایک ذاکر ٹھاکر ڈھول ڈھنڈورے
لوکاں نوں ہشیار کرن لئی گلیاں وچ کھلو گئے
کھوجیاں کھتریاں چونکاں وچ سبیلاں لائیاں
ساڈی تیں ہتھ ڈور صاحبا ساڈی تیں ہتھ ڈور
ککھوں ہولے واؤں سولّے
جو مونہہ کھولے اوہدے اندر
جو پیر اُگھرے اوہدے تھلے
نہ کائی عذر نہ زور صاحبا
ساڈی تیں ہتھ ڈور
بھانویں توں ہوویں بھانویں ہور صاحبا
ساڈی تیں ہتھ ڈور
ماپیاں منڈے کڑیاں ڈک لئے
جوتی تے اوہدے چھیوے ہانی
راول جھمرا جندل جتل مان تے ستی
گھروں نس کے شمس کول آ گئے
پنجویں بوہے اوہناں لا لئے ڈیرے
بھکے تسے نت انیندرے چونکو چونک مچاوندے جلیاں رہے
اُبھربد رو ہولی ہولی کنڈھیوں باہر ہوئی
اِک دینہہ راتیں جوتی نوں کُجھ ملن سہیلیاں آئیاں
گل وچ پا کے با نہیں آکھن لگیاں
ساڈے نال توں جُل اڑئیے سمجھا شمس دی بانی
ڈھیر سارے اساں کٹھے کیتے ہوئے نیں بئے وی ہانی
دینہہ چڑھیا تے پِھرے ڈھنڈورے
شمس دے ڈیرے کولوں جوتی سوبھا مل دیوان دی جوتی
موئی لبھی موئی لبھی
تن تے لیر نہ کوئی
ویکھو لوکو ویکھو لوکو اج دے ولی دے کارنے
ویکھو لوکو ویکھو لوکو
ایس صدی دے قطب سیانو اچیاں بولیاں مارنے
ہٹیاں اتوں لوکی اٹھے چھوڑ حویلیاں لوکی نکلے پوڑیاں ڈھل ڈھل لوکی اترے
ہولی ہولی کہن جنانیاں
کپڑے کدھر گئے نیں اوہدے
راج قلعے دے ہیٹھ کھلوتے لوکی کو کن فیصلہ
مفتی حمد الدین فصیلوں بولیا
اج ہتھ تہاڈے فیصلہ- پُٹھی پوش لہاؤ ایہدی
اُلر اُلر پین سوانیاں
جگ دے پڑدے لاہون والیا اج ہویوں نہ ننگا
پُٹھی پوش لہاؤ ایہدی- پُٹھی پوش لہاؤ ایہدی
راول ونج دیوان ہوراں دے اگے رُنا
سبھ کفر کوڑ اے
سوبھا مل جی راج محلیں جا کے رُلے مینڈا پتر راتیں شمس وے ڈیرے آہا
مینڈھی دھی مینڈا بگا سر مینڈی ساری عمر دی سیوا
سوبھا مل جی بھلا لوڑیندے ہو تاں مڑ جاؤ
چپ کر کے گھر بہہ جاؤ
تہاڈا پتر راتیں شمس دے ڈیرے آہا
پنجویں بوہیوں باہر شمس دے ڈیرے جھمرا آکھے
رسد سواری سبھ تیار اے
سائیاں ایتھوں نس جُلئے
شمس آکھیا
آپنے آپ نوں چھوڑ کے نسیے ول کداہیں جائیے
جِندل آکھے
ایس ویلے اساں جائیے کھنڈ پُھٹ لک چھپ کے ہتھیار لیائیے
ہوراں شہراں وِچوں نال رلائیے ساتھی
وت ملتان دی اِٹ نال اِٹ وجائیے
ستی کہے سانوں ہر دم لوڑ تساڈڑی
مان کہے
تساں ورھیاں اسانوں جیون جاچ سکھاونی اے
شمس آکھیا
ورھیاں نال نہ ویلا مِنیئے
ورھے ہزاراں ڈھیری ڈھیری دَھولے دُھوڑ مُکاناں
ہِکا گھڑی سانوں حشر دیہاڑا
لیکھا لوح مبارک
جیہڑی راہ ویندیاں بانہہ پھڑ لئے
تے جیہنوں آکھ نہ سکیے نہیں
جاؤ نت نال تہاڈے تھیساں
پر اج دی گھڑی ملتانے
میں اج دی گھڑی ملتانے
پنجویں بوہیوں باہر سپاہی جوتی چائی آ گئے
ہٹیاں چَھڈ کے اُٹھے لوکی چھڈ حویلیاں نکلے لوکی
ہُم ہُما کے آئے
پُٹھی پوش لہاؤ ایہدی پٹھی پوش لہاؤ ایہدی
پنجویں بوہیوں باہر شمس نے ڈِٹھی جوتی
نِیل نِیل اوہدا پتلا پِنڈا
سادے سادے نین نقش اوہدے اَت اُجالے
شمس آکھیا
واہ او سجنا
ٹَھپ دیو ایہنوں چتر ٹھگ نوں جادوگر نوں ہور نہ پَھند وکھاوے
پُٹھی پوش لہاؤ ایہدی
مڑ کائی ساڈے شہر نہ ایہہ جیہا آوے
پٹھی پوش لہاؤ ایہدی- پٹھی پوش لہاؤ ایہدی
شمس آکھیا
لے سجنا
اساں لاہے پرانے تدھ گھر آون دی تیاری
وَیندی شام دی لالی اندر
ویکھ جوتی نوں شمس آکھیا
لے سجنا
اساں جاگن ہارے- تینڈی جاگ توں نیندر واری