ہر واریں میں بھا بشیر دے ٹھہرناں
میرے بیلی بھا بشیر کوئی میرے نالوں اِک ادھ ورھا وڈیرے ہوسن
پر میں اوہناں دا ادب لحاظ بہوں کرناں
اوہناں دی انصاف پسندی، بے غرضی
حق سچ تے اڑ کھلون وِچ بے خونی
مینوں اوہناں ساہمنے چور بنائی رکھدی اے
میں رب مذہب ورتارے بارے بھاءبشیر دی سوچ دا مُڈھوں جانو آں
اوہ آپنے ولوں پڑھیا لِکھیا بندہ کر کے
گل بات لئی مینوں ہمیشاں ٹوہندے نیں
میں ہمیشاں آہو جی جی آہو جی کر کے
پیندا پیچ ولا جاناں
اوہناں دی اکھ وِچ میرے ولوں
ماڑا جیہا الاہما دُھکھدا رہندائے
مینوں نموشی جیہی انیویں ٹُنبدی رہندی اے
ایس واریں وی بھا بشیر دے ٹھہریاں
اسیں راتیں چِرکے بیٹھے رہے
گھر دی خیر خیریت مُکی
آہو جی جی آہو جی دِیاں سوڑیاں پوڑیاں
شروع ہوئیاں پر ہولی ہولی مُکدیاں گئیاں
ادھی رات
اسیں آہمو ساہمنے لتھ کھلوتے
بھا بشیر نے آکھیا:
بندہ اِکواریں کُل دلیلاں ورت کے
عقل دے پُورے چانن
سارے شک پھرول کے
اِک کُل مختار دی ہستی دا اقرار کرے
پھیر کیتی رکھے
میں کہیا بھاءجی عقل چھاننی
عمر سمندر پیندی اے
نت رہندی اے سکھنی
''نہیں نہیں بندہ پُورے گوہ نال
آپنے بندے اوہدے مالک ہوون دا
اِک واریں اقرار کرے
پھیر ایہہ گل نہ پھولے''
مینوں چُپ وِچ لہندا تاڑ کے بھاءنے ڈور ودھائی
''جزاءسزاء وِچ جے یقین نہ ہووے
پھیر کوئی کِسے نال چنگا کرے تے کیوں کرے''
میں کہیا بھاءجی ماڑا کردیاں جی مر جاندائے
بندیاں دِے سانگے
بھوئیں ہوا سورج دِے سانگے
جیون تانا پیٹا
اِک وی دھاگا کُھسیا تے بندہ مُسیا
''نہیں نہیں
بندہ آپنے آپ کوئی ٹُھک ٹھیٹھ نہیں بنھ سکدا
حُکم نتارا کردائے کچ پک دا
بندے بُھلنہار دی اُونی سُرتوں باہرا
حُکموں باجھ نظام نہیں چلدے''
میں کہیا بھاءجی
آپنا سارن ہار اُسارن ہار وی آپے
آپنے آپ نوں آپے ڈھاوندا گھڑدا
لڑدا مندا
آپنے چانن آپنا آپ سیانے
آپے مانے
نِت بے صُورت نِت صُورت
رانجھا سانجھا
کل دے مومن اج دے کافر کردا
وگدا جاندائے
''نہیں نہیں
مادہ بے حِس اے بے امر اے
حُکم اے حرکت
حُکم دا منبع مادیوں باہر اے''
مُکدی رات
میں تے بھاءاِک نویں اپنیتے جُڑدے جُڑدے
اِک نویں وجوگیں جاگے
سجراءالاہمہ بھاءدی اکھیں
میری نموشی سجری
دن سارا میں کمیں کاجیں رُدھا رہیاں
راتیں بھاءبشیر مینوں سوٹی ہتھ وِچ پھڑ کے گڈی چاڑھن آئے
''ساڈے محلے کُتے بُہت نیں
راتیں ہتھ وِچ سوٹی رکھنی پیندی اے
بھرجائی تیری نے چُوچے پالے ہوئے نیں
ایہہ دُوجے چوتھے اِک دو کھا جاندے سن
اج دُوپہرے میں تے چھوٹا سوٹے لے کے کھلو گئے
کٹھے چار گھیر کے اندر تاڑ لئے
اندروں کُنڈے چاڑھ لئے
اسیں دو کُو گھنٹے لگے رہے
میں ماراں تے چھوٹے ول اوہ بھجن ٹَونکدے
اوہ مارے تے میرے ول
اخیر اوہ چارے پِٹھاں جوڑ کے وِچ کھلو گئے
مخے ہُن تے اساں نہ چھڈیا پُترو
بھرجائی تیری خوش نہیں
اخے اوہ وی تے کِسے رب دے بنائے ہوئے سن کہ
میں سمجھایائے
ہر شے اوہدی بنائی ہوئی اے
پر چُوچیاں دی راکھی ساڈا ذمہ اے
اسیں اوہناں دا رزق وسیلاں سانوں پُچھیا جانائے
تُوں عجیب ایں
چُوچے مرن تے تاں نہیں راضی
کُتے مرن تے تاں نہیں راضی''
میں بھاءبشیر نوں آہو جی جی آہو جی کردا گڈی چڑھ گیاں