''جِیوکا سوادی ہو وَیندا اے
جدوں بُرکی بُرکی وِچوں واس اُدھار دی آوے''
''آہو، اُدھار پھڑے پیسے نال ای
کُکڑ قورمہ کھادا جاندا اے''
''نہیں یار،
میں اوس اُدھار دی گل نہیں پیا کریندا،
اوہ تے میں نہ چایا کدیں
نہ چایا نہ لاہیا،
ایہہ اُدھار چُھٹکار اے
مَل چَھل دی پکڑ توں''
''ایہہ تُدھ کیویں مانی
مَل ورتارے اندر رہندیاں
اوہدی پکائی کھاوندیاں''
''اسیں تے ہر ویلے
اوس چُھٹکار دی آس وِچ ای وسنے آں،
جو وی بنے سرے،
اوہا آس کر یاراں نال سانجھی
ہسنے رَسنے آں،''
''آہا،
مینوں ایہہ تیری کیتی سُن کے
گھنٹہ پہلے کھادی روٹی
ہُن سوادی ہوئی اے''