لگا رہے دربار سوالی پئے آون
جے نہ رہے سوالی کوئی
لگے کیویں دربار
عدل دی کون تاریخ لکھاوے،
سو جو اُپجے اوہ گِھنے عالی
تُھڑ تِھڑ کھڑے سوالی
بندوبست اجیہا چلاون بندا فرض نہیں شاہی دا؟
نہ ہووے جے گھالا مالا
دھکا دھرو مُک جاوے
کیہدھر ونجن مُنصف قاضی
پُلس وی گھر بہ جاوے
سو جائداد تے مَلّ مال نوں حق دستور بناون
بندا فرض نہیں شاہی دا؟
مُک جاوے جے روگ سوگ
بند ہسپتال ہو جاون
حکیم طبیب تے ڈاکٹر کِتھوں کھاون
سو مُلک مُلک چوں روگ منگا کے
شہر گراواں وِچ ورتاون بندا فرض نہیں شاہی دا؟
بھر بھر ڈُلھن ہٹ بزار
گاہکی گاہک ودھاون
لوڑاں تھوڑاں تے تھوڑاں لوڑاں دے رَل سرکاراں میچ کھڈاون
وِکن نویں ہتھیار
بنّے باڈر کھڑکن دھڑکن
لگا رہے دربار