سچا سُر لگ ونجے تے مِینہہ ورھ پوندا اے
سنگل تِڑک ویندے نیں
پانی نوں بھا لگ ویندی اے
ایہہ تے کہانیاں آہیاں
ہُن سنیائے تجربے تھئے نیں
مچھیاں پشواں رُکھاں دے روگ پرانے
سہج سبھا ای سُر نال موڑے پے ویندے نیں
واء دا ہووے سُر، پانی دا
توڑے بندے دا کڈھیا ہووے
پر سُر گلاں نہیں ہوندے
روز سیانے آہندے نیں:
گلاں نال کدیں کُجھ سَریائے
کوئی ڈُبا لیکھا تریائے
ٹُکر جُڑیائے بُھکھیاں نوں
کہ مان نمانیاں وَریائے
نہ کرن دا ویٹیا گل چُن بھلا پرو سکدی اے؟
چلو سُر گلاں نہیں ہوندے
مَنیا
گل تے سُر ہو سکدی اے
سو ہور کرن نہیں سَردا تاں آؤ رَل گل کرئیے