فرید بھنڈار

بار-

وِچ گراں -

ناؤں کانِیاں

حویلی پکی وِچکار

کچے کوٹھڑے چھپّر دوالے

گھوڑے اٹیرن راٹھ-

بنگلا نہر پیا

چُھری کنڈا پتلون کموڈِیں

کُرسی لال تے افسر دفتر

کنبدی میز تے ساوا کمبل

گِٹھ گِٹھ مرلہ تُھک پٹواری بنھ کُلّا سلوار

ہَیٹ بُوٹ پھڑ سوٹی کلّر لہر پیا-

ادھ مسِیتڑ ادھ سکولی

بیلدار اساں میٹ ہوئے-

ایتھوں ہور پرے

گھنٹہ گھر گڈ چَونک سپاہی

ناؤں لائل پور چار بزارا شہر پیا-

سَوکھے چھوہر1 دو پڑھن لہور پئے

پڑھ لیٹ ہوئے

بَوہڑ آکھن اساں آپ کانِیاں

1 - بھگت سِنگھ تے اوہدا چاچا اجیت سِنگھ-

آپوں گھڑ کَت لاء اساں مُڑ لِکھنی بار دی وار

قید اِک مُلکوں باہر ہویا

دُوا چڑھ سُولی گیا

پِچھلے اوہناں دے لے گیا سن سنتالی اودھر

پنشن لے اساں ایدھر چِلم بھکھائی

زہر قہر ولوں رہے ہُشیار نِت پڑھ اخباراں، گھت چُونڈھی نسوار