اج لطیف1 سوہنی نوں آکھے
کچا ہووے توڑے پکّا اڑِئیے
گھڑا وسیلہ نہیوں تیرے پار جاون دا
پٹ چیر فقیر نوں گل لاون دا
وسیلہ تن من وی نہیں ایس اُرار دا گھڑیا
چھوڑ وسیلے
ایہہ حیل سبیلے اڑِئیے
عشق ہے تاری تیری
اوہ نہیں جیہڑا وِچ غزلاں دے آیائے
جیہنے ہالی بالی وُڈ لوایائے
جیہڑا چاڑھ اسمان منارے رب نوں بانگ سُناؤندائے
پا پلازے ٹل کھڑکاوندا
بُھکھ بھیڑ لا دیگاں ونڈن آوندائے
1 - شاہ لطیف-
عشق ایہہ چیتا ای اوہناں دِناں دا
جدوں شہر نہیں سن پئے اجے
اپنی کرنی ویچن لوکیں باہر نہیں سن گئے
ایہہ عشق سواد ای بُھلیا
دان دی فصل اُگاون دا
اِک بئے نوں بُرکی پریت چکھاون دا
ایہہ عشق اَلا ای بے سر1
سانجھی جھوک وساون دا
بلخ بُخاریوں لتھ لاہ لُٹیا اپنا آپ گوائی
تَن مَن مندر دُھوں دُھکھائی بیٹھا اڑِئیے
تینوں پار بُلاوندا ای
اج لطیف سوہنی نوں آکھے
کر دسیا جو تُوں شاعر نوں اوہا تینوں سُناوندا ای
1 - جھوک والے شاہ عنایت جیہناں دیاں سنگیاں آپو اپنی مالکی چھڈی تے سانجھی رہت بنائی، ورودھیاں بادشاہ فرّخ سیئر دے حُکم نال جھوک نوں گھیرا گھتیا تے 1718 وِچ شاہ عنایت نوں دھوکھے نال قتل کر کے اوہناں دا سِر دِلّی گھلیا- رِیت ایہہ ہے جو سارا راہ سر وِچوں شعراں دی اواز پئی آئی- اوہ ”بے سر“ دا کلام آکھیا جاندا ہے-