''تُسیں دِل دِیاں کرنیاں چاہوندے او میرے نال،
سمجھ کے دوست پُرانا،
میں تے صِرف تُہانوں ایہہ دس سکناں
اوہ وقت گیا، ہُن ہور اے،
کُل دُنیا تے کمپنیاں ہُن کُھل چُکیاں نیں،
چاہوندے او تے ناں نمبر میں دے دیناں،
پہلی تُہاڈا ناں پتہ تے اگا پِچھا پچُھ کے تُہانوں
دس دیسی
کیہڑی کمپنی ایس قِسم دِیاں سُنن دا کم کریندی اے،
اوہ دُوجی سُن علاج دسیسی
تے گھلسی ترِیجی ول تُہانوں
جیہڑی علاج کریندی اے
خاص تہاڈے والی دِل دی دا،
اوہدیاں اگوں برانچاں نیں
اوہ دسیسی کِتنی واری کیہڑی برانچے جانا اے تُساں
جاسو تے سبھ ٹھیک ٹھاک ہو جاسی''
''بس ہو ای گیا اے
ہُن مینوں لوڑ نہیں رہی''،
''ایہہ بُھلیکھا نہ ہووے،
چاہو تے میں دس سکناں
بُھلیکھے کیہڑی کمپنی گِندی پُندی اے،
اوہ آپے دس دیسی
لاہون والی کیہڑی اے''