کیہنوں پچُھیئے کیہ ہو سکدا ہا
تے کیہ نہیں ہو سکیا
اوہناں نوں جیہڑے اِتھاؤں پئے جاندے نیں
کہ جیہڑے نویں پئے آؤندے نیں
اوہناں نوں؟
چلو پچُھنے آں دونہاں نوں کٹھیاں،
جیہڑے ویندے نیں پئے آکھن لگے
''اساں مغلاں دا ویلا ڈِٹھا تاں کوئی نہیں
تاج محل اوہناں دے تکے نیں فلماں تے تصویراں وِچ
شالاماراں وِچ گذاریاں کئیں اتواراں
میلے چراغاں دے وی ویکھے،
انگریزاں دا ویلا اسیں ہنڈایا اے
سڑکاں پکیاں نہراں ریلاں
رنگا رنگ اِنڈسٹریاں
کیسے کیسے ارب پتی اوہناں محلاں وِچ،
کِتھے کِتھے سینتر اوہناں دی اپڑی،
تناں مناں دی لِف چوں کیویں راج کمایا
کیہ کُجھ سودا ہو بزاریں نہیں آیا''،
جیہڑے پئے آؤندے نیں
اوہناں سُنی گل ساری
اکھے جی سانوں تے ایتھے آوندیاں نوں
چِرکالاں وِچ وسدیاں وڈکیاں کھیڈ وکھالی اپنی
کیویں اوہناں
رُکھاں دا دِتا دان
پتراں پھُلاں پھَلاں دا
رل مانیا انتاں انند ہنڈایا،
رنگ اپنے
رُکھاں اوہناں دیاں اکھیاں راہیں
انگ انگ وِچ لاہنے،
رل رُکھاں نال نچنا اوہناں
پتر بول گاون دے
پھُل پھَل مُرکیاں تاناں،
اساں وی ایہا کھیال کھیڈنائے
رنگ اجوکا کرنا اے،
رل اُپایا رل کھانا اے
ایسے سُکھ وِچ رل جیونا جی مرنا اے