چراں پِچھوں
اج مائی ستو مِلی اے،
آئی اے ڈھارے
سنگیاں وِچ بیٹھی اے،
ٹُھوٹھا پانی دھریائے میں اگے
پوٹا چھوہ متھے تے اپنے میرے اوہنے لایا اے
باتاں کئیں سُنائیاں پائیاں نیں
اِک تُسیں وی سُن بجُھ لؤ،
آہندی اے:
سنگیاں نال میں بیٹھی آں اِیویں اِک ڈھارے
کرنی جرنی سُننی آں سبھ دی
دِھیرو بیٹھی نال میرے اُنگھلائی اے
ہُجکا ہولا جیہا میں لایا اے
اُٹھ ہتھ مُونہہ تے پھیر گُھلاٹ ہوئی اے
’ہُجکنائے جیہنے مینوں
اوہ ست پیڑھیاں آپنیاں
اَٹِیاں رَلے رَولے
میتھوں آن پُنا لئے‘،
آکھ کے باہر نِکل گئی اے
مگرے گئی آں میں
تروڑ پُگاٹ دی تند چُونڈھی
تلی دِھیرو دی دھری اے
نپ بانہیں اوہنے کِکلی میرے نال پائی اے
پرت اسیں دوئے ڈھارے آئیاں
بہہ دھیرو میرے نال آہندی اے سنگِیاں نُوں
آؤ دمو دم ہُجک کے ہک بئی نُوں
ہنگلاٹ ورانے لاہیے
ساگ پُگاٹ چھکا تلیاں نُوں
کِکلی نویلی پائیے