بیان الرشید یعنی منطق الطیر جدید
عرف قصہ اِل و کاں
تصنیف لازوال شیخ محمد عُمر جلال مدظلہُ
سابق مہتمم اعلےٰ محکمہ مال حال سرپرست انجمن بہبودی اِطفال
سَنت نگر ثم سُنت نگر لاہور
''ویکھو کاں ٹیوشن پڑھدا انکل کولوں''
''ٹیوشن بہانائے، کاں پھسائی بیٹھائے انکل''
''بڑی گل اے ایس عمرے بئی''
بنچ دی ڈھو تے بیٹھاں کاں میں آپ دھیانے پڑھدیا ں گولیا نہیں سی
اگوں لنگھدیاں منڈیاں دی گل توں
سوڑ جیہی ایویں میرے اندروں لنگھی ہونی اے
اوہ اِکدم اُڈیائے پِچھوں
تاں مینوں سہی ہویائے اوہ کِنا کول سی میرے
نِکیاں ہوندیاں توں مینوں کاں نہیں چنگے لگدے
کھڑے کھلوتے پئے تربھکنا
کھان والی کوئی شے ہووے تاں مونہوں ٹُھنگنوں وی نہ سنگنا
لگنا کوئی کمی کمین نیں دُھروں ندیدے
میں سوچنا
ایڈے کالے کوجھے نوں کوئی چُوری کیویں پا سکدی اے
نالے ایڈا تُھڑیا حرصی کِسے دا سُنیہا کیویں لیا سکدائے
سن سنتالی نال ای سمجھو جو وی سی اوہ گل پرانی ہو گئی
ہن تے گھراں چ کاں نہیں آوندے
ایتھے باغ چی دِسدے نیں
اِل تدوں وی دور دراڈی ہوندی آپنی لگدی سی
بھاویں اجے اسیں شاہین دا نہیں سی پڑھیا
فِکر فاقہ نہیں کوئی
پسوڑی کوئی نہیں
کُھلیاں پَراں تے بے پرواہ
اسمانیں تردیاں رہنا
اوس ویلے دی مال روڈ تے کاراں جیویں ہوندیاں سن
ساڈے اللہ بخشے تایا صاحب وی اِل دے منن والے سن:
''چِیل دا رعب تدبر ویکھو
نیویں رُکھ تے آہلنا چِیل نہ پاوے گی
آپ وی رج کے سوہنے جنے سن
اُچے بھارے
صبح سویرے ورزش کر کے دُھپے تیل ملاؤنا
گورا جسم اوہناں دا تپ کے لال سوہا ہو جانا
لوڈے ویلے کشمیری چادر لے کے باہر بہندے سن
اِل نوں چیل ای کہندے سن
بھیناں نوں ہمشیرہ جیویں آکھی دا سی
(تدوں سسٹر کوئی کوئی آہندا سی)
''گرج نحس اے چیل مبارک
مردہ شے ول اکھ چیل نہ چاوے گی
اِک اسمان تے دونویں نیں
پر گرج دی دنیا ہور اے چیل دی ہور اے''
چاء گلابی
اندر اوہناں باکر خانی بھور کے کہنا-
اِلاں کولوں سانوں ڈر اودوں ای آونا
گوشت صدقے دا جدوں چھت تے کسے سٹ جانا
سانوں لال ٹوپیاں والیاں نوں ماسیاں پھپھیاں اندر بھجاونا
تپیاں اکھاں مُڑیاں چُنجاں
تدوں ای دِسنیاں سانوں
اوہو جیہا ڈر پاگل کولوں آوندا سی تد یاں شرابی کولوں
وڈیاں ہو کے نیڑیوں اِل میں چِرکی ڈٹھی
اوس پرانے ڈاک بنگلے لُگے
پَیر پَیر اوہ کنبدی واڑ چ وڑدی جاوے
اوہدی گھابری اکھ توں اوس ویلے وی ڈر جیہا آیا مینوں
اُچیاں پرانیاں ڈھین ہاکیاں گھراں دے ہیٹھوں لنگھدیاں جیویں آوندائے
کُھلا مُونہہ تے پوٹا دھڑکے دوال کاواں دا گھیرا
رولا
دشمن جوہ وِچ پیرا شوٹ توں لہندا زخمی ہوگیائے افسر
ڈانگاں بھوئیں کھڑکاوندے نیں پِنڈ دے
کول وی نہیں نیں جاندے
بِج گھوڑ چڑھی منگول دھاڑ چوں کِر گیائے کوئی پھٹڑ
وٹے چائی بال دوالے
کول وی نہیں نیں جاندے
چوکیدار نوں آکھیا میں کاں اُڈا دے
اوس اکدو واریں کاں تراہن دی رسم جیہی وی کیتی
پھیر آکھن لگا صاحب ایہہ جرم نہیں ایہناں دا
ایہدی آپنی آئی دا جُرم اے
ان پڑھ بندہ نواب دین ایہہ
سہج سبھا ای جُرم لفظ ایہنے کیویں ورتیائے
کیوں ورتیائے
ایتھے پُلس والے وی آوندے جاندے نیں
سُن لیا ہونائے
پر ایس گل وِچ جُرم لفظ دا کم کیہ ہویا
پھیر انگریز ویلے دی چِٹی لمکی مُچھ ویکھ کے نواب دین دی
مینوں اِکدم ٹھنڈ جیہی پے گئی
جیویں میں اوہدی چوری پھڑ لئی ہووے
ایہہ پِچھلے ویلے دے ان پڑھ بندے ''ظلم'' نوں ''جُرم'' ای آہندے سن کہ