فرید بھنڈار

اساں نِکس کِتھائیں ہور نہیں وَینا

وس اِتھائیں رہنا اے،

جو پئی ہوندی اے جر کے اوہنوں

لامبے ہو نہیں بہنا

مَل دا ملبہ پیہہ پدھراونا اے

ہاری ساری دیاں پاہیاں نُوں،

وِسریاں اِکتائی دِیاں سدھراں دا مِینہہ

وت ورساؤنا اے

1 -نِکس: نِکل-2 -جر کے: سہہ کے- 3 -لامبے: اِک پاسے-4 -مَل: مالکی، جائیداد، نِجی مِلکھ، قبضہ گیری-5 -ملبہ: 1) سامان، 2) ڈھائی عمارت دا کباڑ، ٹُٹیاں بھجیاں اِٹاں لکڑی، رہند کُھوند،3) چودھریاں دا راہکاں کولوں کھوہ سہیڑیا پیسہ افسراں نوں کُھواون پیاون لئی-6 -پدھراون: پدھرا کرن-7 -ہاری: ہالی، بھوئیں تے ہَل چلاونہار- 8 -ساری: سارنہار، بناونہار، توڑ پُجاونہار-

9 -پاہا: پیدل چلن دا راہ-10- وسرِیاں: بُھلیاں، چیتے چوں لہہ گئیاں -11- اِکتائی: اِکائی، سہج ورتارا-12- سدھر: چاہ، خواہش، تک، تانگھ-