فرید بھنڈار

‘‘چلو اج گل سنگیت توں ٹورو’’

‘‘کیوں؟ گل ہور اے کوئی تے سنگیت بہانہ اے ٹورن دا؟’’

‘‘تُسیں سیانے او

گل بھاویں کوئی ہووے

لوڑ بہانے دی اوہنوں اکثر رہندی اے ٹورن ٹُرن لئی’’

‘‘گل دا ٹورن کُڑی دا ٹورن ہویا’’

‘‘سنگیت نوں کُڑی سمجھ لؤ’’

‘‘اج گل تے ہے جیون دی

نہ سچ، تھیون دی’’

‘‘سنگیت جیون دا انگ اے’’

‘‘کیہڑا؟’’

‘‘کدے کوئی کدے کوئی، جیہڑا جوالے سوئی’’

ایہہ تے منی منائی اے نا جو ہر گل اوہ ہوندی اے جو ہے

تے کوئی ہور وی ہوندی اے’’

‘‘ہر ویلے نہیں ہوندی’’

‘‘بحث لمیری اے کرنے آں 

سنگیت نوں پہلوں ویکھ لؤ’’

‘‘اج سنگیت دی چالُو ونڈ ہے پَوپ فوک تے کلاسیکل’’

‘‘سنگیت لفظ وِچ گیت وی ہے پر نالے ای سنگ وی ہے

ایہہ سنگ دا گیت اے

سنگ چوں جمیا

گیت چوں جمیا سنگ اے’’

‘‘سنگیت تے ہے رَل گاون، رَل کرن جیہڑا رَل الاون بنیا

سنگیت تے ہے رَل جیون دی سُتی آس جگاون

سنگیت دی چالو ونڈ سنگیت چوں سنگ نوں کڈھ دیندی اے’’

‘‘ویہندی نہیں

سنگ تے گیت اک گاف1 نال اک تھئے نیں

جے ایہہ گاف آکھے میں گیت دا ہاں 

تاں سنگ سنّ2 بن جاسی

جے آکھے میں سنگ دا ہاں 

تاں گیت اِیت3 بن جاسی

یایت4 آکھ لؤ

گیت نہ رہسی

سنگ تے گیت نوں وکھ تھیون لئی آپو اپنے گاف لیانے پوسن’’ 

‘‘چالُو ونڈ والا سنگیت گیت تے ہے سنگیت نہیں

گاون والے چڑھ سٹیج تے گاوندے نیں

سُنن والے

 ٹِکٹاں پاساں دے منظورے

ہال چ بیٹھن آوندے نیں

سٹیج تے ترِکھی لو پوندی اے ہال چ گُوڑھ ہنیرا

گاون والا ترِکھی لوئے پھیلردا اے

سُنیئر گُوڑھ ہنیرے سُنگڑدے نیں

ایہہ سنگیت بہانہ بن ویندا اے

اِک دے لوئے ہو کے سبھ نوں وِچ ہنیرے کرنے دا

اِک دے پھیلر جیون دا تے سبھ دے سُنگڑ مرنے دا

رُوپ دھارن ہے اِک دا

ہوراں نوں بے رُوپ کرن لئی

بے رُوپے بے شکلے پہلوں شکل والے نوں سجدہ کردے نیں

سجدے وچ بے شکلی اپنی پھیر ویکھ کے ڈردے نیں

ہر کوئی آہندا اے میں ایہدے ہار ہو جاواں 

سٹیج تے چڑھ کے ایہنوں لاہواں 

لاہ کے ٹِکٹ پھڑاواں 

ہوراں وچ بہاواں 

سنے ایہدے سبھ وِچھ جاون میں چھاواں 

چھاون دا پرچھاواں اے ناواں’’

‘‘ایس گیت نوں سنگیت بنا ورتاون لئی

سُنن والے بے شکلیاں نوں کیئں مکھوٹے ونڈے جاندے نیں

کدے محلاں درباراں وچ ڈھو لا بیٹھے بادشاہاں دے

کدے سَم تے سِری جَھٹکدے پنڈتاں خانصاحباں دے

کدے پَیلیاں فیکڑیاں وِچ تاڑی ماردیاں نچ گاوندیاں مزدوراں دے

ایہہ سنگیت بہانہ بن ویندا اے

سٹیجی شکل والے دے دُھر اندر

بے شکل ہنیریاں ہتھاں دا بے ہاتھ ڈراوا دَھرنے دا’’

‘‘گل ہے جیون دی

نہ سچ، تھیون دی……’’

1- گاف =  (1فضول گل، بکواس، یکڑ  (2 حدوں لنگھن دا عمل

2- سن  = جوڑاں دے وچکارلا پاڑ، چور دا کندھ وچ پایا پاڑ

3- اِیت = کوئی رُت دی اوکڑ جیویں سوکا، بے لوڑا مِینہہ، ٹِڈی کِیڑے دا حملہ

4- یَت = روک، باندھ، جاپن محسوسن دی سکت نوں دباونا، الیل نوں مارنا