فرید بھنڈار

جَھڑ ساون دا، لارنس باغ چ بیٹھاں میں،

اوہ آیائے میرے نال بہہ گیائے،

گرم سُوٹ تے

لِشکدے بُوٹ،

''مینوں مِلے تے ہو تُسیں''

''کِتھے''

''چِڑیا گھر وِچ بچیاں نُوں لے کے آوندے او''

''جی جی جاوی دا اے بالاں نال،''

''ہاتھی اُپر بہاوندے او''

''جی''

''نال آپ وی بہندے او''

''بال اجے ذرا نِکے نیں،

تُسیں اوتھے کوئی اَوفیسر او؟''

ہسیائے:

''بدّھے ہوو کُھلے ہوو ایہہ پٹہ تے گل وِچ پیندا ای پیندائے،

قیدی جنوراں نال سکیواں کیہ بندا اے بندے دا؟''

''ڈر کُجھ لہہ جاندائے،

جنَور وی ٹرین کیتے ہوندے نیں سٹاف نے''

ہسیائے:

''ہاں جیل وی ٹریننگ کالج اے''

میں وی ہسیاں:

''تُسیں آکھنا چاہوندے او، ٹریننگ کالجاں وِچ

جیلے رہن دی ٹریننگ دِتی جاندی اے''

اوہ نہیں بولیا

ذرا ٹھہر میں آکھناں، سٹاف دی خاص ٹریننگ ہوندی ہوسی شیراں واسطے''

''تُسیں کُھلے شیر تے ویکھے ای ہوسن''

''نہیں جی، موقع نہیں مِلیا، فلماں وِچ ای ویکھے نیں 

اُنج سوچ کے وی ڈر آوندائے''

''کُھلیاں نوں ڈر دی جاچ نہیں ہوندی

بدھیاں نُوں ڈر دی خاص ٹریننگ دِتی جاندی اے،

بندے ہوون شیر ہوون، ہُن تے بدھا کُل جہان اے''

آکھدا اُٹھ اوہ ٹُر گیائے

جاپے مینوں گل اوہدے تے بھاری جَت پئی لہندی اے بُھوری

آہو، واج اوہدی وِچ گُھٹی گُھٹی اِک گرج جیہی وی آہی،

ایہہ چڑیا گھر چوں نس کے نہ آیا ہووے،

اُٹھ میں جھبدے گھر ول ٹُر پیاں