دس چھڈیوجے میاں صاحب نوں عُذر ایس تابیا دار دا
کلاس رُوم توں باہر ایہنے
گل کدے کیتی نہیں، کرنی کیہ اے ہوندی ای نہیں،
جدوکا ریٹائر ہویائے
ایہہ تھڑا ای کلاس رُوم اے ایہدا
کرنی سُننی اے جیہنے ایتھے ای آ جاوے،
ہاں جی کتھوں چھڈی آہی؟
پھڑو جتھوں وی شیخ جی
اوتھوں ای چھڈی سمجھو
جتھے کھلوتی مِل جائے
اوہا سٹیشن گڈی تہاڈی دا اے
چڑھ جاؤ، ٹِکٹ وی آ جاسی،
ہاں، گل ٹُری سی، جِن پرِیاں ایہہ کتھوں آئیاں،
حاضر سن جی شیخ جی مُڈھوں
بندے دے اندر
حُسن دے طاقت دے ان ڈِٹھے کرِشمے
جیہناں نوں جیوندے جی تانگھدے نیں،
آہو جی حاضر سن
پر ان ڈِٹھے کرشمے ہو کے نہیں
کرت ورت دا انگ سن
تانگھدے نہیں سن جی کوئی ایہناں نوں
رات دینہہ سبھ ماندے سن،
وت کیہ ہویا
مانن تانگھن کیوں بن گیا
ہویا ایہہ جی
وڈا وکھاد پیا
گھنیری خلقت چھڑی کمیر ہوئی
کیتی ساریاں دی کُجھناں سانبھ لینی
اوتنی چھڈنی ساریاں کیتے
جتنی وِچ کمیر جیوندے مساں رہن،
سانبھن ہاراں جاتا کم ونڈ صحیح ہوئی ہُن
مانن کم اساڈا ہے کرن کمیراں دا،
ایہہ سار نہ آہی
مانن کرن دا انگ ہے
کرن دا لایا رنگ ہے
کرن کنوں وکھ ہو کے مانن مر ویندائے،
مانن دا کھپا پُورن لئی
سانبھن ہاراں کول سانبھ کنوں اڈ ہور تے ہویا کُجھ نہ
تے کھپّا ایہہ ہویا اپُور
جتنی سانبھ بھرو اتنا ای واندا ہوندا جاندا اے
ایہہ واند ڈراونی ات سہانی کر ورتانی پوندی اے،
سانبھن ہارے شاہ شہنشاہ جد ہو گئے
اوہناں واند وِچ تُرت وسایا جِن پرِیاں دا دیس
پروکھا عام جہانوں
شہزادے شہزادیاں جتھوں لہندے نیں،
حُسن بے حدا پری دا ہویا طاقت بے حدی جِن دی،
کیوں شیخ جی ایہو نہیں وکھایا؟
سیف الملوک دے سفرالعشق وِچ میاں محمد صاحب؟
کیوں لِکھیا ایہہ قصہ اوہناں اُنھوِیں صدی دے ساٹھے وِچ،
قبضہ انگریزاں دا
جدوں پکیرا ہو پنجابے گِڑیا
اوہناں سنجان لیا ہا
شہزادے شہزادیاں والا ویلا نواں ہو آ ڈُھکیائے
عشق بندیکا سانبھ راج اُلٹاون دا ہُن وسیلہ اے،
عشق بندیکے دا تے قصہ لِکھ ای بیٹھے آہے اوہ
اٹھاراں سو ستونجا وِچ،
شاہ سوداگر عزت بیگ
لاہ عزت وپاری لکھاں کروڑاں والی
کمہیاراں 1 دا مہینوال ہویا،
گھڑے گھڑیندی سوہنی نال مِلن لئی
انت فقیر تھیا
دونہاں چنہائیں ٹِھل دھوائی رہندی میں دی مَیل،
گورا حُسن تے گوری طاقت پرِیاں جِناں دی جاپدی اے
پر جگ ایہہ جِناں پرِیاں دا وی بادشاہی دا ای دیس اے
اوہا ویر ورودھ تے سہنسے، نویں بھیت ٹھگیارے،
ہُن تُسیں سیانے او
کرو گل، اگے ٹورو
کہ چھڈ دینی جے عُذری شیخاں تے
رجّے نہیں اجے اِک سنتالی واندی تھالی کولوں؟
1- کمہیار= کمہار، کُمبھار-