''وے باؤ تُوں بہندا کیوں نہیں''
''جی کریندائے لُوں لُوں تینڈا چُمّاں''
''بھُل نہ جاوِیں ایہہ چکلہ اے،
واہناں وِچ میں واہن ہاں،
ٹَیم ٹَیم دا بھاڑا تار کے اندر وڑیا ایں''
''واہن تک تینڈی
جگ چکلے چوں کڈھ کے مینوں
ان ہوئے جہانِیں لے آئی اے''
''ایہو جہیاں سُنیاں ہوئیاں نیں مائِیاں دائیِاں کولوں
جیہڑیاں آئے گئے نُوں ولا کے ایدھر آندیاں نیں اج،
دسیندیاں نیں وِرلِیاں نِکل کے ٹُر وی گئیاں
تینڈے جیہاں نال
تے بن کے ماواں بال سنبھال کے اوہناں دے
گُذر گئیاں،
کِتھے وسیا اے نواں جہان، وکھا نا''،
''ہووے تے وکھاواں''،
''مینوں تے جاپدا اے
جد تائیں جی جی جگ دا
اوس آہر وِچ نہ رلے
اوہ وسنا کوئی نہیں،
میں تے ایہا کرنا اے ہُن اِتھائیں
ساتھناں نال رل کے ستھ بناونی اے
تے تن من ایسے کرم چ لا دینا اے''
''سمجھ گیاں، تُساں ایتھے کرو
میں سنگیاں نال باہر وی ایہا رل کریناں''
واہِن= باہرلی، ویہاری کار دا اُلٹاء کرن والی- آندیاں = لیاوندیاں -