]سِیتُو کراڑ دی ہٹّی- پنجاہاں دے پیٹے ہونا اے سِیتُو- نظام، جبرو، موبرا، سگھر تے راشی آئے نیں [
نظام: (ہتھ جوڑ کے) شاہ جی دان
سِیتُو: مانگت تے نہیں جاپدے
نظام: مانگتاں دے گھلّے ای آئے آں
سِیتُو: ہِندو او مسلمان؟
نظام: نہ اوہ نہ اوہ
سِیتُو: پھیر گِرجے دے باہر کھلوو
موبرا: شاہ جی ایہہ دوئے مسلمان نیں تے اسیں ترَیوے ہِندو
سِیتُو: (پیسے موبرے ول کر کے) ایہہ لؤ نا تُسیں تے، ایہہ جاون شیخاں کھوجیاں کول- ساتھوں ودھ اے لاہا اوہناں کول- سیّداں دیاں ہٹاں تے وی گھنی اے وکری- اوتھے کیوں نہیں جاندے ایہہ
موبرا: نہ شاہ- ایویں تے نہیں نا- تُوں ہٹوانیا ای نہیں، وڈا شاہوکار وی ہویوں - قصور لہور وچ وی تینڈا ناں اے- انج کر نا- ایس ویلے جو تینڈی تجوری وچ اے اوہا دے چھڈ
سِیتُو: تجوری دی چابی مینڈے کول نہیں ایس ویلے
نظام: مینوں ڈِگی لبھی اے راہ چوں - خبرے ایہا ہووے
(کھیسیوں آر کڈھی سُو- تجوری دے مُونہہ نال لا کے وٹّے تے رگڑی اے- ول تجوری دے مُونہہ وچ دھرِیوس، کُھل گئی اے- روکڑ کڈھ کڈھ ساتھیاں دیاں پرنیاں وچ بنھائی اے، آپ وی بنھیوس رہندی- تجوری سکھنی اے ہُن)
سِیتُو: تریہہ ہزار…… مینڈی ساری کمائی…… ہُن میں کیہ کراں
نظام: شاہ جی، ساڈے نال رل ونجو- دھن سارا ہِیناں نال سانجھا کرو، جیہناں دا ہے ایہہ- بھکھ تس مُکّے تے ساری خُدائی سواہری ہو جِیوے- تہانوں وی سنگ ساتھ دا سواد باہوڑے
سِیتُو: سوچناں میں (بہہ گیا اے)
]پنجے ہٹیوں نِکل ٹُرے نیں - اگے اِک منگتی آ ہتھ اگیرے کیتوس- موبرے موڈھا ماریائے نظام نُوں [
موبرا: (مُونہہ کول کر کے) اوہا، سوَنّی
(نظام اپنا پرنا منگتی نُوں پھڑایا اے، موبرے وی- ٹُر گئی اے- موڑ تے آئے نیں تے اِک ہور منگتی-)
موبرا: اوہا…… سوَنّی
]سگھر تے راشی پرنے اوہنوں پھڑائے نیں، ٹُر گئی اے، پنجے جگپوروں باہر آ اَوجھڑِیں ڈھلے نیں - اگے گھوڑِیاں کول سوَنّی کھڑی اے[
موبرا: کِتھے کِتھے ویکھیا اے تینوں سوَنّی، کِنیاں ہو تُسیں ……
سوَنّی: کئیاں وِچ اِک تے اِک وِچ کئیں - ایتھے (گھوڑِیاں ول سینتر) سنگیاں اپنیاں نال پئی اُڈِیکدی ساں تُہانوں ……
(جبرو نُوں) واگ پھڑائی؟ (جبرو پرنا دِتوس)
سوَنّی: (پھُمنی پا کے) ہُن جنج ایہہ ڈیرے ڈُھکے تے ویاہ دے چاول کھاوے
راشی: تُوہیں چاڑھی اے جنج سوَنِّیئے، تینڈیاں پیراں وِچ ای ڈُھکنی اے نِت-
سوَنّی: اپنے پیرِیں ڈُھکے، دینہہ رَین ویاہ، دینہہ رَین ویاہ
(پنجے گھوڑِیاں تے بہہ اَوجھڑے ٹِھل پئے نیں)