ترَے ریڑھیاں سَیکل پہیئے
سِیکھاں والے بوہے نال ڈھو لائی کَھلیاں نیں
بنک سی پِچھے بند ہو گیائے
دونہہ دے ریڑھی وان ای کوئی نہیں
تریجی دا اِک لوہے دے ٹُول تے بیٹھائے
اکھ نِندرائی، مُڑھکا، مَیل پجامہ کُڑتا
وِچلی کول اِک ڈِھڈل بُڈھڑا اِٹ تھڑی تے
دھوتی صافہ بانہیں وساکھی
آئے گئے کولوں اِک اُنگل چا خیر منگدائے،
گھنٹہ مینوں ہو چلیا اے
ایہو جگہ اوہنے دسی سی یا ہور کوئی
پھس گیا ہونائے کِتے ٹریفک اندر،
لنگھن والے لنگھی جاندے نیں
جنے جنانیاں ہفیاں تفیاں
خیر پاون جوگا خبرے کِسے کول ہے کہ کوئی نہ
نہ ریڑھی ول گاہک ای ڈُھکیائے ہُن تائیں کوئی
بوتل نِکی نَیسلے دی آ اِک جوان پھڑا کے ٹُر گیائے بابے نوں
اوس دَھر وساکھی پیسے گِنے نیں کِھیسے چوں
ہُن اُنگل بوتل چا چا منگدا گُھٹ گُھٹ پِیندائے
مگر جاواں تے پُچھاں نہ میں اوس جوان نوں
ایہہ بابا تیرا کُجھ لگدا اے کہ شرط مَنت سائی کوئی
پھیر آکھناں چھڈ رہن دے
متے اگوں آکھے تُوں کون ایں پچُھن والا
نالے تُوں اودھر جاویں اوہ آوے ٹُر جاوے