جدوں دا سیال چڑھیائے
ایہہ روشندان تے آوندی چُنج کھڑکاوندی اے
روشندان میں کھولاں
آہلنا پا بہسی
سارا دِن ایہنے آونا وینائے
راتیں اندرے رہنائے
تابی سونا کوئی نہیں
''تریہاں ورھیاں توں
ایس گھر مینوں سُکھ دا سون نہیں مِلیا''
پر پھڑکاوندی اے
جیویں ویری مگر چڑھے نیں
تھلے پوچھل دے
پُھل اے لال گُلابی
لالی نالوں وڈیری اے
کالے سِر تے نِکی جیہی اے کلگی
اُپروں بدامی پر نیں
تھلیوں سلیٹی کالی پیر وی کالے نیں
جدوں دا سیال چڑھیائے
چار واری آوندی اے
ساجھرے پنج وجے
نَوں ساڈھے نوں،
دوپہریں
تے شاماں پین توں پہلاں
چوگے ویلائے خبرے
روشنداں میں کھولاں
اِنج پئی کردی اے جیویں گل کوئی کرنی ہووے
ایہہ متے نر نہ ہووے
نر دا آہندے نیں رنگ بھرماواں ہوندائے
نالے کلگی وی
کتے آنڈڑے بیٹھی چھوڑ آیائے
بُھل بُھل ایتھے ای آؤندائے
نہیں پر نر دا پُھل نہیں لُکاواں ہوندا
کِتے آہلنا ہور بنایائے
ہُن بُھل بیٹھی اے
پر انج کیوں کردی اے
جیویں اندر ایہنوں کُجھ دِسیائے جیہڑا دَسنا سُو
ایہو دِسیا ہوسی:
آہلنا پا ایتھے
کَڑی چھتیری وِتھ اے
رُکھاں دا بھروسہ نہیں
اِلاں کاواں دا شہر اسیں پردیسی آں
ہور بھلا کیہ دِسنائے
بُلبل لگدی اے
غزل والی نہیں، دیسی
پر اوہ ذرا ہوندی اے نکیری
نالے ایڈی چُنج نہیں ہوندی
شیشے وجاون جوگی
نالے تھلے پُھل نہیں ہوندا-
خورے ہووے ای
کیہڑیاں بُلبلاں دے تھلے اگے توں جھاتے نیں
اوہ نہ ہووے اِکو رنگ دِیاں
ہوون ڈھیر سہیلیاں
واری دیندیاں نیں
ہے کول جیویں کوئی بھیت چڑھے سیالے دا
چین کرن نہیں دیندا-
روشندان میں کھولاں
وِٹھاں، بوٹ، پر، تِیلے
آکھے نہ آیا گیا-