آ بِینِیئے،
مِل گئی او مُورت لالی دی؟
اوہ سچ، تُہانوں تے نہیں میں دسّی،
نہ نُورِئیے فتُورِئیے تینوں
نہ ایہنوں گاجو بِل بتَوڑی ناساں چَوڑی نُوں،
ایہہ بِینی پِھینی تہاڈی
چِترکار ہوئی ساڈی،
واہِیوس لالی
مینوں پھڑائی
’بھاء وکھالو مِیئیں گنڈوئے نُوں، ٹھیک اے؟
بھیتی ہوئے اوہ پکُھو جنَور دے‘
میں گیاں
کوئی پنجی کُ مِنٹ لا ویکھی اے برساتی ہوراں
تے رکھ لئی نیں کول
بس دس ہور لا آکھیونیں مینوں
شپچُو بِینی ٹور میرے ول
لالی نال مِلاواں،
بھاء ہو آئی آں میں ماسی برساتی ولوں
مِلے نیں پا گلوَکڑی عجب ترسیویں دی
مُونہہ چُمیونیں دُور دُوراڈیوں کر نیڑے
میں لالی تیری نُوں بِینو گاون سُنایا ای راتیں
سُن سُکنی آں میں وی ماسی؟
ہتھ پھڑا مینوں اپنا ویڑھے آئے نیں
لگے پَینڈا چوکھا کر اسیں ہور کِتے آ پُجیاں ہاں
گاون ماسی برساتی میں وِچ جوڑ رلاواں
سہجے نچ اچنبھا اِک ہو نچنِیاں ہاں پئیاں
’آئی مینا آیا طوطا
کر تُوں مِٹُّھو اَوڈر چوری پِٹزا
میں گانا ریکارڈ کرا آواں
مینا ویٹ کرِیں
گانے نُوں سُوٹ کریندی لِپ سِٹک تینوں سلیکٹ کراواں
بول ایہہ طوطے مینا دے
سُگھڑ گھرہستاں پوہ گئے نیں
دھر لئے نیں اوہناں تَویاں اُتے
موہ پنجیری چکھ پنجریڑے ہو گئے نیں‘
اندر پرتِیاں پیر پیر کر میں تے ماسی برساتی،
واہی لالی میری مینوں پھڑائی نیں،
ویکھنی آں پئی، ہور جیہی اوہ جاپے،
تکنی آں مُونہہ اوہناں دا،
’جا وکھال نا مِیئیں گنڈوئے نُوں، اوہا ای اے؟‘
برانڈے وِچ ای بیٹھے مِیئیں ہوریں پڑھدے نیں
میں لالی کول بہائی اے،
چنگا چِر تک مُسکائے نیں:
’اُڈن تے آ گئی ایں‘