سچ اے؟
میں بے یقینا پُچھناں
وِرک آہندائے آہو
اکھے پِنڈ گیاں
تایا آہندائے مَجھ ماندی اے شہروں کوئی قصائی لے آ
ایتھے کِسے نوں کم نہیں آؤندا
اِکو گھر ہا
چَھترا بکرا لاہ لیندے ہن بے سوادا
اوہ وی سیانے ہوگئے نیں
میں بخشی نوں ترلے نال منایا سائی دے بہایا ٹیکسی
اکھے شہروں باہر میں گیا کدیں نہیں ہٹی چھڈ کے
بخشی چُھریاں لائیاں
تایا میرا دُکھی جیہا ہا
چُھری چھوہی تکبیر پڑھی تے سَور گیا
بخشی مَجھ ڈھائی کَھل لاہون لگ پیا
میں سوچاں تائی کدوں کھروڑے چاڑھے
میں سَوَختے واپس جانائے
بخشی گوشت کردا اِکدم پِھس پیا
تایا آکھے کیہ ہوگیائے، پانی دیو اوئے
بخشی ڈُسکے اَٹھ سُوئے سہہ گئی جے بہشتن
اٹھے ویچے تُساں تے کوہ اساں اگے کڈھے
میں آکھیا تینوں کیہنے دسیائے بخشی
اکھے ایہہ دِل ویکھ لے
اَٹھ موریاں گِن لے
میں تائے ول ویکھیا
اوہ ہولی دِتی آہندائے ‘‘سچ اے’’
بخشی لیکھا لیا تے ٹر گیا
فجرے کھروڑے کھادے اساں
کُجھ ادھ سوادے
ورک دی سُن مینوں ہیر دمودر والا رانجھا چیتے آوے
جس تروئی دا دُدّھ پچھان کے پینو نہ چا کیتی