وساکھا آہندا اے
میں اکھاں مَلدا اُٹھیاں
پیائے ککھ کیڑا کوئی
وت سہی تھیائے، نہیں، ہِنک پئی اے کنِیں اَوَلّی
درد کناں دا اکھیاں نوں ہے
ہویا گوانڈھ چروکا،
مینوں ٹھاکر دی رتھوانی کردیاں چار وِیہاں لنگھیاں نیں یارو
گھوڑی گھوڑے دی بولی پڑھدیاں
نہیں ایہہ اگے بِڑک پئی
کہے گھوڑی
ہووے ہور ویلا کوئی ہور تھاں
پوے نہ جتھے مُونہہ کڑیالہ
کہے گھوڑا
ایہا تانگھ طلب ساڈا دانا پٹھا
ایہا چابک راس ہتھ اوہناں دے
جیہڑے چڑھدے لہندے اِک دُوجے نوں کہندے نیں
‘‘ایہناں رتھ جُپیاں نوں بان ہے رتھ اُلٹاون دی’’
کہے گھوڑی
ایہا تانگھ طلب ہے اٹکل ساڈی اوہ جہان وساون دی
وساکھا آہندا اے
ساز جتھے ہا اوتھے ای دھر میں نکل آیاں
جیوں لُڈن بیڑی کھول چنائیں ٹِھلیا ہا
چڑھسن ٹھاکر مگر میرے
ویکھو اوٹ مِلے مَتے کال دِیاں جوگنِیاں دی