کِتھاؤں آئی ایں تُوں،
باہر شیشے تاکی دے
سِیکھو سِیکھی مار ٹپوسی
اُڈ گئی ایں
جھات اندر نہیوں پائی،
رتی سِری
کھنب مِٹیالے ساول ونّے
گھاہ ادِسنا جیکن زِویں تے
چُنج چنبہ دوئے کوئل کالے،
چائی پُوچھل آئیوں گئیوں، رُوں پچھیتر چِٹا،
چلو چِڑی تاں ہوئیوں آکھن نوں
جیکن اسیں بندے ہاں
پر تینوں اوہناں چِڑیاں کولوں وکھ کر کِیکن یاد رکھاں
جیہڑیاں ہر پل آل دوالے
جُگاں اگیرے ساتھوں ہن اس شہر دیاں وسنیکاں؟
ہیں کوئی پردیسن توں
شیشہ سِیکھاں ٹوہ پروکھے تھی گئی ایں؟
کُجھ چِر مگروں تیرے
شیشے چُنج کھڑکی
ویکھاں چِڑی اِک عام
جھات اندر پل چھنڈ کھنب اُڈ گئی
ویکھاں نِکڑے پر دو اندرلے وچ تاکی دے پئے سلیٹی
جاں نِجھاواں بَھے ساوی وچوں جھاتے
''آہی اوہ ساڈے وچوں ای
ہووی اکھ سُنجانیں
جُگ جَگت ہے ویس اساڈا''
دھر لِکھت ایہہ تاکی گئی اے