فرید بھنڈار

کون آیا پہن لِباس کُڑے

تُسیں پچُھو نال اِخلاص کُڑے

(رہاؤ)

ہتھ کُھونڈی موڈھے کمبل کالا

اکھیاں دے وِچ وَسے اُجالا

چاک نہیں کوئی ہے متوالا- پچُھو بٹھا کے پاس کُڑے

2-

چاکر چاک نہ اس نُوں آکھو- ایہہ نہ خالی گُجھڑی گھاتوں

وچھڑیا ہویا پہلی راتوں - آیا کرن تل آس کُڑے

3-

نہ ایہہ چاکر چاک کہِیں دا- نہ اس ذرّہ شوق مہِیں دا

نہ مُشتاق ہے دُدھ دہِیں دا- نہ اِس بھُکھ پیاس کُڑے

4-

بُلّھا شوہ لُک بیٹھا اوہلے- دَسّے بھیت نہ مُکھ سی بولے

بابل ور کھیڑیاں توں ٹولے- ور مانڈا مانڈے پاس کُڑے

پچُھاں تاں کیئیں بندیاں نیں کافی بارے سجر پڑھنہاراں دِیاں - اِک تے ایہہ ہے، کیوں جی، ایہہ اَدّھو سُدھ فارسی لفظالی کیوں تُکاں وِچ اُچیچا- ویکھو نا رہاؤ لِباس، اِخلاص-

پرتاوا اِک تے ایہہ ہے، فارسی بولی حاکمی دی جو ہوئی- اوہدے لفظ ادھ چیتیں کِرنے ای ہوئے لوک بولی وِچ- پر جد کِردے نیں تے لوک بولی ایس اکھر کیر نُوں اپنے رنگ وِچ وی تے رنگیندی آئی اے نا- ایتھے نرول لباس اخلاص کیوں -

پرتاوا دُوا ایہہ ہے- کُڑیاں جیہناں نال گل پئی تِھیندی اے اوہ گل دسنہار دِیاں ہانناں نیں - دسنہار اے ہِیر چُوچک دی دِھی مِلکھی میل دی سِرکڈھ پاتر- تے ہانناں وی اوسے میل دِیاں ای ہوسن گھنیاں - وِچ کمیراں وی ہوسن- اوہناں وِچ وی امنگ تے ہوسی مل وان ہوون دی پر کمیراں ہوون توڑے مل واناں ہن تے ناراں ای- تے ناراں دے چِت وِچ کال تے سری ہوئی اے، کِتے دبی کِتے اُگھڑی- ہِیر وِچ کال اُگھڑوِیں اے- سبھ ویہاری مل چھنڈ نِکلے رانجھے نُوں مِل کے کال ہِیر دی سُرت دا اوہدی کرت دا مُڈھلا انگ بن ویندی اے- ہُن ایہہ اُچ میلی فارسی لفظالی اِک وئینگ اے، جیہڑی سنگیاں نُوں چھیڑ جھنب کے کال دِیاں سپاہناں پئی بنیندی اے- تے اوہ سپاہناں ہِیر دی فوج بن لڑیاں نیں مِلکھی میل دے سردار نُورے سنبل نال- کال دِیاں سپاہناں جوگنیاں نیں - جوگ جُڑت ہے، جوگنیاں جُڑت کاراں نیں ویہاری پاڑاں نُوں میلن والیاں - آپ اوہ ویہاری لوبھوں واہنیاں نیں -

رانجھا''ہُن کون'' اے، بے ناواں خلقی- اوہدا لِباس کیہ اے- کالا کمبل- کم دا بل- کرت سکت ای اوہدا پہراوا اے- کمبل ہے وی کالا، کال پروانیا- تے رانجھا چاک نہیں - چاکری تے ویہاری آہر اے، مال مِلکھ دی رَکھ- رانجھے دی گُجھڑی گھات اوہدا ٹِیچا1 اے- مَلّ ویہار نُوں اصلوں اُلٹاون- اوہ پہلی رات دا وِچھڑیا ہویا اے- پہلی رات اوہ سانجھ وسیب اے جو لکھاں ورھے نِبھیا، رل کرن رل کھاون رل گاون دا- منکھ ڈھانیاں پتر پھُل پھل سہیڑدیاں تے رل بہہ کھاندیاں تے گاوندیاں آئیاں - گاون جِبھ دا وی تے ہتھاں دا وی- غاراں دِیاں کندھاں تے مُورتاں گاون دا ای رنگ اے- ایہہ رلت ای مُڈھ تے انت اے جِیون دا- تَل- ایسے تَل دی آس ای لے کے آیا اے رانجھا- تَل مُڈھ اے، بُنیاد- تَل دھرت اے-

رانجھے نُوں مَجھ مالکی دا چَس نہیں - نہ ای مجھاں نُوں چوء کے ویہاری اُپج کرن دا، دُدھ دہِیں والی-

رانجھے دا شَوہ اوہدا تت ست اوہدا کرت ٹِیچا ای اوہدا بھیت اے، راز- اوہ فرق جیہڑا ہور کرنہاراں کنوں اوہنوں نکھیڑدا اے- رانجھا مُونہوں ایہدا اعلان نہیں پیا کریندا-

بابل چُوچک اے، آگو مل وان- اوہ مل واناں وِچوں ای ہِیر دا ور پیا لوڑیندا اے- پر ہِیر دا ور رانجھا تے ہِیر دے پاس اے-

کافی وِچ بُلّھے شاہ آپ ہِیر نیں تے رانجھا (کون) اوہناں نال اِک تھی گیا اے- اوہناں دی لوک ریتل جوڑ کاری اُتھل دا سوما اے-

1 -ٹِیچا= نِشانہ گول، ایم، انت (ایجنڈا)-