جموں توں اِک پَتر جھولی کِریائے سُکا
ایہدے پُٹھے پاسے نِکے نِکے کوئی گھر نیں خبرے
ترے ترے دیاں چار نیں پالاں
چھیکڑ دونہہ دی اِک اے
چوداں،
جُڑے ہوئے،
متے اِکو گھر اے چوداں کمرے
اِکو جیہے شربت رنگے
دُدھ کاغذی جیہی کوئی گُنھ بنائے
ایہناں گھراں وِچ کِیڑیاں دیاں متے مکھیاں ہوسن
گُنی وسائیاں گُنی گوائیاں
ماکھی اوہناں دا سُوئی دے نکے جتنا
امرت وِس دا ترُبکا
یاں ایہناں گھراں وِچ رہن والیاں
کیڑیاں دیاں وی کیڑیاں آہیاں
جیہناں نوں کیڑیاں کھا گئیاں نیں
ایہہ کتے کیڑیاں مرتبان نہیں دھر گئیاں
شربت رنگے چپن اپر چِٹی چکری
چکری وِچ وَت شربت بِندی
طبلے نہیں جیوں کِیڑی خانصاحباں دے
کجھ مرتباناں دے ڈھکن کوئی نہیں
کہ کیڑی پُلس نے طبلے پاڑ چھڈے نیں
متے نِکل گئیاں نیں کرماں والیاں
دِن دے آہر لئی بوہے لاہ کے
یاں خبرے تد تائیں رہیاں نیں جد تائیں رہیا اے پَتر ساوا
سُکن لگا اے
تاں ایہہ ہڑپہ چھوڑ ٹکانا کر گئیاں نیں
متے اندرے ہوون جیون جوگیاں
نِکل آئے ہُن پَر نیں
نہ ہُن اوہ نیں جو اوہ آہیاں
نہ ہُن ایہہ کوئی گھر نیں