” ہُن کیہ کِسے نُوں پچُھنا
کِدّھر جانا اے“
” کر جیہڑی کرنی اے، آپے تُدھ سیانا ایں “
” سیانپ دا کوئی ٹھیکہ تے نہیں نا ہوندا
کلّے کلّے دا“
” سیانپ کِھیر ہوندی اے“
” پچُھ دَس دیاں سِیراں راہیں سردی اے جیہڑی“
” پچُھنا اے کیہنوں“
” تے دس کیہدی تے کیہی
کدن تے کاہنوں مننی اے“
” آہو، کتنی مننی اے تے کِتنی سَنھنی اے“
ویکھو نا
جے مسِیتے ٹُر پوئیے
تاں وی پچُھ ای ٹوہنا اے
چُھہارا ایں تُوں میاں اکے مخانا ایں“
” آہو،
گھر جیہنوں آپنا آہنا ایں
اوہ کِنا تینڈا اے
تے کِنا کو پُلسَل ٹھانا اے“
” بہہ کے رونا دھونا اے اُتھاں
اکے اُٹھ کے نچنا گانا اے“
” لمّا پَینڈا اے“
بس ایہو دس بھَلی اے
ہُن ٹُری آؤ، نہیں؟“
” ٹور ای پندھ اے، ٹور ای ٹکانا؟“
” جیہڑا کیہڑا ایانا اے سوئی اے سیانا،
اکے جیہڑا کیہڑا سیانا اے اوہا ای ایانا“
” بس ایہو ای بانا اے
تے ایہا ای لاہنا پانا اے“
” چھڈو،
دسّو اج کیہ کھانا اے،“
” بولو نا چُپ کیوں کر گئے او“
” پھولنے آں کِھیسا:
کیوں وئی
بھریا ہیں کِناکو تُوں
تے کِنّا کو خالی ایں،“
” ہیں مالک کہ مالی ایں،“
” کیہ دساں
میں تے آپ سوالی آں“
” پچُھنا ایں کُجھ کہ منگنا اے“
” کدوں اُدھیڑ کے آپنا آپ
اُدّھر1 میں کَکھ تھی جانا اے،
ڈگا2 ہو واء دا ڈھول وجا
سُک سَڑ کِھلّر گیاں نُوں جوڑ
وت پروار اُگانا اے“
1- اُدّھر: آزاد ہو کے-2 -ڈَگا: لکڑ دا ٹوٹا جیہدے نال ڈھول وجیندا اے-