”علموں بس کریں او یار“
کافی دے ایہہ بول کیہ پئے آہندے نیں
جیہڑے علم نُوں پرے کریندے نیں
اوہ ہے کیہ،
اوہ وکھالا اے اپنی میں دا،
لفظاں دا کِھلار پسار
لِکھنہار دی وڈیائی دا چرچا کریندا اے
پر ایس چرچے نال
لِکھنہار دی سَوڑ گھٹدی اے
اکے ہور ودھدی اے؟
ایہہ سَوڑ مَل ویہار دی اُچ جِھک نے
دِتی اے،
برابری دا نہ ہوون
جی دے اندر چِنتا دھر دیندا اے،
جی برابری آنن دا جتن کرے
تاں چِنتا مُکدی اے
جے ایہہ جتن اوہ نہ کرے تاں چِنتا ہور پسردی اے
تے جی
اکھراں دے کِھلار پسار دے جِلھن1 وِچ
ودھیرے کُھبدا جاندا اے،
ایہہ علم اے جیہنوں بس کرن دی
مَسلَت2 کافی پئی دیندی اے،
پر اسیں آپ وی
اکھر کھلارن پسارن وِچ ای تے نہیں رُجھ گئیاں متے،
کافی کھڑدی اے پئی ساڈے موڈھے تے ہتھ دھر،
آؤ کافی دے نِرت سرووَر وِچ ٹِھلیئے
تے اِکدُوجی نُوں مِلیئے
1 -جِلھن: کھوبا، دلدل-2 -مَسلَت: صلاح، مشورا-