فرید بھنڈار

اج بِھٹیاں نال نچ

نی دِل دِئیے باہمنیئے

وَٹ لے جھوٹھ دا سچ

نی دِل دِئیے باہمنیئے

بِھٹیاں نوں کیہ لِبڑن دا ڈر

دھا سمندریں تھیئے سمندر

تھلاں دے اندر چڑھیاں ہاٹھاں 

سُکنا ای تاں بچ

نی دِل دِئیے باہمنیئے

تیر میر والی پِرت۱ نہیں رہنی

بِھٹیاں بِھٹ خدائی جانی

کل دے وید پُران سیانے

اج نے کیتے کھچ

نی دِل دِئیے باہمنیئے

کُلیاں جُڑیاں تاں بنسی وَستی

جِتھے پریت ہوا جیہی سَستی

اِکل وانجے بُھرسی تیرا

دَھولر چُونے گچ

نی دِل دِئیے باہمنیئے

روگ پُرانے دارو ہو گئے

۱- پِرت: رِیت' طریقہ' وِہار

دارو پچھلے مارُو ہو گئے

پک صدیاں دے کردے پتھر

گالے ترُبکا کچ

نی دِل دِئیے باہمنیئے

دُکھ جیہناں نے کیتے سانجھے

اگ تیہناں دی جَگ نوں مانجھے

دُھکھدے دُھوں لوا لے کالکھ

پچھوں پَوسِیا مچ

نی دِل دِئیے باہمنیئے