فرید بھنڈار

آہ1 جنگلہ؟

ٹپو نا اگے جنگل جے

ویہندے آئے آں

اِک واری گیا جو مُڑ نہ آیا

سُنیاں نیں، اکھے اگے راج براجا

کِکر بیری دا سانگا

اِک دُوجے وِچ وڑ وڑ نِکلن

ٹانگ ڈانگ نہ چھانگ مانگ

نہ کوئی پُشاکا نانگا

نہ ڈیرا نہ لاہنگا

اوہناں بھانے ہے جنگل منگل

سانوں تاں ایسے پاسے ای وارے جمعرات بزاری

جَھٹ شاہ عالمی پَٹ لُہاری مِدھ مدھول سواری

جُوت پتان سو واجا گاجا

جو بُھکھ سوئیو کھاجا-

لنگھدے کھلو گئے او

خبرے کون او کون نہیں

واقف کاراں نال جیہڑی نہیں کرنی بندی

کر دئیے تہاڈے نال تاں کیہ کُھس جانا اے

پُلس اجنٹ تُسیں نہیں لگدے

ہوو وی تاں کیہ اے

کیہڑا تہاتھوں ٹھانا اساں ڈُھوانا اے

سو سُن لؤ

”اِک واری گیا جو مُڑ نہ آیا“ گاون دے بول نیں فلمی

کئیں گئے مُڑ آئے، سچّی جیہڑی جے

اوہناں وِچوں ای اساں تُساں وی اِک ہاں

سو لگے چلو

دوئے اِک مِک ہاں

-1 آہ= 1) ایہہ (سینتر)، 2) ہار، دُکھ دا ہؤکا-