تہاڈے بھانے واج ساڈی کُکڑوں کڑوں اے
ہے نالے بانگ وی
مناں مُونہیں وعظاں ساڈے کناں وِچ پور مُڑ
پُٹھی چُھری مُلوانی گاٹے تے پھراندے او،
اپنے تے بال امریکڑے پڑھاندے او
ساڈے آنڈے تل تل آملیٹ کھاندے او،
کُکڑوں کڑوں تیرے بودے پئی جُوں،
روڈیاں سِراں دے وِچ جُواں دیاں کوٹھیاں
مغز کھوال تُساں کیتیاں نیں موٹیاں
اوہناں کولوں راج کاروبار چلواندے او،
سانگ ایہہ کدوکا اسیں جردے ای آئے آں
لالسا تہاڈی کیتے مردے ای آئے آں،
اساں اِک دو نہیں لکھ تے کروڑ نہیں
دُھروں ای الکھ اساں ہوئے بے گِنتے
کرسو کیہ، جُون ای مُکا ساڈی چھڈسو نا
جُوناں تے مُکاوندے ای آئے او
سار نہ تہانوں تھئی
اپنا ای ست گواون ہوندا اے
دُوجیاں دی جُون مُکاون
ہوند اپنی سُنگڑاون
سُنگڑی ہوند ہوندی اے ہَومے
ہومَے کھلارن جگ توں جیون مٹاون ہوندا اے،
جِیون تے ہویا رَلیا رُوں
چِننگ پئی تے ہویا دُھوں،
میں نہ رہیا تے رہیا نہ تُوں
کُکڑو کڑُوں بھئی کُکڑو کڑُوں