]کچے کوٹھے وِچ پرنیتو، نظام تے جبرو[
پرنیتو: تُہانوں پتہ ای اے- جو تھیا اے پانڈوکے انگریز راج دی چھاں ہیٹھ تھیا اے- پِچھلے دیسی راج بھوئیں والاں دے سِر تے کھلے آہے- اوہ واہکاں راہکاں کمیراں دی کیتی کھس گِھندے آہے ہالا بندی راہیں - انگریز راج راس والاں دا اے- ایہہ ساڈی کیتی نُوں کچا مال کر اپنیاں کرخانیاں وِچ ڈاہوندے نیں - ساڈی محنت نُوں اپنا لاہا بنا گِھندے نیں - ساڈی گھال ای ایہناں دی راس بن ویندی اے- لاہے نُوں چَون پنجونا کرن دا وسیلہ- دیسی بھوئیں وال تے وپاری ایہناں دے ہتھ ٹھوکے نیں - اوہناں دا اپنا وی ناں ناواں بندا اے تے بدیسی مالکاں دا وی-
جِتھے کِتے نابری دا بی پُھٹدا سہی ہوندا اے اُتھاں دوئے دِھراں سِروں پیروں لاہ کے اوہنوں مارن دا ٹِل لاوندیاں نیں - نابراں دی کرنی اوہناں دے جرن سرن دی ستیا دے سِر تے ہے-
نظام: سچ اے ایہہ نتارا
جبرو: اگوں پرکھ ساڈی جرن سرن دی ستیا دی ہونی اے، ساڈی سنگ سہیڑن دی ستیا دی
پرنیتو: (گاوندی اے) جیہناں جیہناں رل گاونا اے
آون تے گاون بناون
اُلّر اُلّر بول پتراں چوں
واجاں نُوں پئے رِیجھن
باہوڑن کچیاں کوٹھیاں توں
بِھیڑیاں گلیاں وِچوں
ڈھل ریتلے ٹبیاں توں
ڈھلانی چھپراں ہیٹھوں نِکل
سجر ترنگ سَرسوتڑیاں
آون بُلاں نال بُل مِلاون
رل کرنی رل کھانی جُون وساون
نظام: (اُٹھیا اے پرنیتو نُوں گل لا چُمیاس)- تُوں ای بھاکو ایں - (جبرو اوہدے ہتھ چُمے نیں)
اساں ہُن اگانہہ وینے آں - لاکھی جنگل وِچ جاء بھالنے آں
پرنیتو: (پرنے ولھیٹیا دِتوس) ٹُکر سویر دا گھن ونجو- اوہ تریوے وی تُہانوں اُتھائیں مِل پَوسن- ساڈی جُوڑی وی سار رکھسی- سنیہے اپڑدے رہسن-
(نظام تے جبرو ہتھ رِدیاں تے دھر نِکل گئے نیں)