بھری دُکان دوائیاں دی اے
ہور وی سودائے
پیو کدیں ہوندائے کرڑی برڑی داڑھی لمّی
پُتر دوئے، کدیں اِکو
کالیاں لمیاں داڑھیاں
لنگھدا کدیں میں نِکی بوتل پانی دی گِھن ویناں
پُتر اِک پچھان گیائے متے
آئے گئے دے نُسخے پڑھدا
ٹِیکے دوائیاں کڈھدا
پچُھیوں بِنا مینوں بوتل پھڑا کم لگ ویندائے،
اج میں آیاں
ہور گاہک نہیں کوئی
اندر کھلوتا سودا اگانہہ پِچھانہہ پیا کردائے
مُونہہ وِچ کُجھ پیا پڑھدائے
ویکھیوس مینوں،
آون وِچ جھٹ چنگا لایائے
بوتل دھر مُڑیائے
میں پیسے کڈھے نیں آیائے
‘‘بھلے سمے دُکاناں والے آہندے ہوندے سن
گاہک ٹغے دا ہووے بھاویں
سبھ کم چھڈ کے اوہنوں پچُھو’’
سِر ہلایوس سُن کے
‘‘تُساں میری گل دا بُرا تاں نہیں منایا؟’’
ذرا جِنا مُسکایائے
‘‘نہیں میں پلّے بنھ لئی اے
چِٹے تُساں بھروَٹّے ایویں تے نہیں کیتے’’
بوتل پکڑ میں ٹُریاں
سوچیں پے گئے نیں بھروَٹّے
ایسے پَلّے بَجّھن لئی اساں اپنا رنگ گوایا؟