ڈھول نیاں دے اج سِراں تے گجے نیں
کرنہار کیوں سوں گیائے بُھکھا
ویہلڑ جگے کیوں رجے نیں
کیویں ننگیاں ننگ ہنڈھائے کَجیاں کجّے نیں
ماواں کول نہیں چوگا کچھڑ بوٹاں لئی
کیوں سجریاں آہلنیاں دے بُوہے وجے نیں
ڈھول نیاں دے کیہڑی لاہموں آئے نیں
ساڑ نموشی دے جیہناں جھلے
اوہناں ورھیاں بدھی سینیاں وچ رَسائے نیں
ہُن کِرک والیاں
سائیاں دے کے سراں دِیاں سدوائے نیں
ڈھول نیاں دے
سُن کے جاگو مِیٹ سوانیاں
نمو جھانے سُتڑے جنے جگائے نیں
ڈھول نیاں دے کیہ کرسن
وِرلیاں وِرلیاں جُھگِیاں نوں
ورھدے مینہہ وچ چُپ کھلوتِیاں لُگِیاں نوں
اکدوجے دے ہاں دی واج سُنا دیسن
جِیبھاں اُتے آن کے مُڑیاں گلاں نوں
جُڑ کے کُوک بنن دا ول سکھا دیسن
چِکڑ سَوڑیاں گلیاں وچوں
کَلّر چَٹیاں پَیلیاں وچوں
چڑھسی کٹک نمانیاں دا
ایکا تان نتانیاں دا