ایس وارِیں ساون نہیں وسیا
وسیا ای ہونائے، ساڈے گھر نہیں
لہور شہر ہُن وڈا شہر اے
پتہ نہیں لگدا کِتھے وَس گیائے کِتھے نہیں
اِک پاسے سڑک دے پانی کھلوتا ہوندائے
دوجا سُکم سُکاّ
سُکّے گِلّیاں نوں نہیں ویہندے
گِلّے سُکیاں نوں نہیں
کم کار ای ایہو جیہے نیں
نالے ہر کوئی جَھکدائے گَل نہ پے جائے اگلا
کیئاں سالاں دے کوٹھے لِمبن والے سن
خبراں پڑھیاں
مِینہہ پیا آوندائے اوہ جیہڑا سٹھ سال نہیں آیا
کوٹھے ای ساڈے نِرے نہیں چوندے
کندھاں چوں پانی لُک چُھپ فرش تے آ مُوتردائے
بھال منگائی مِٹی چیکنی بھو پرانی
گھانی کرائی
مُلتان دا کاریگر سی بُڈھڑا
آکھن لگا ‘ہُن آکھو مِینہہ کوں آوے’
سُنیا مِینہہ کراچی جا لتھائے اوہ خبراں والا
کراچی ہور وڈیرا شہر ہویا
شہراں نوں بَھلا پرانے بابے نانک ورگے
زہر قہر کیوں کہندے سن
متے زہر نال ای اِٹ اِٹ جُڑدی اے شہراں دی
وِچ وِچ زہر اے باہر قہر اے