ٹکری او شپیا وڈے مہر دی ووہٹی کل
مِلّاں دی مالک،
پُتر وزِیر سفیر ہوئے جرنیل جوائی،
آوندی اے پُل تے
گارڈ نال دریا وِچ بوٹی سٹن لئی
ڈَھل کدیں ہیٹھ وی آؤندی اے،
میرا وی پھیرا وِرلا ہویا ہُن
کدیں تے تاری آر پار دی روز ای لگدی آہی،
جاندی اے نا مینوں پُرانی
خبر تے رکھدے ہوئے ایہہ سبھناں ساڈے جیہیاں دی
دِھی صاحبزادے دی او نا شپیا
پِنڈ حویلی آہی ساہویں نانے تیرے دے گھر دے،
صاحبزادیاں کول زمیناں پِیری
سیاست آہی انگریز تھاپڑے والی
نقدی تے کار وپاریاں کول ای ہونی ہوئی نا
اوہناں نوں ایہناں دی اوٹ لوڑیندی آہی
ایہناں نوں اوہناں دے نوٹ
سو دونہاں دِھراں دا کم ساک نال سُوت گیا،
رونا روئی اے راوی رُسن دا
'مِلّ میری دی ووضو کرُولی پی وی راضی نہیں ہوندی ایہہ بُڈھڑی'
ایہہ دَسنا بُھل گئی اے،
دسیوس مینوں لہور شہر دے مُسّن دا
صفائی یاد کرائی سُو
''شعر کتُورے پِھرے نی شہر وِچ انقلابی سَیدو
چھڈے وَیریاں دے
سن سنتالی آندائے جدوں ساڈے وڈیاں
ٹَوں ٹَوں مُلک مذہب نوں کردے،
دُر دُر نال پِچھانہہ ہو جاندے
اگلے چونک مُڑ اوہا ٹَوں ٹَوں،
اخیر گولیاں سٹنیاں پیاں تھاؤں تھائیں دوائی دِیاں
چَٹ چَٹ مُکے
کدیں سُنی او ہُن ٹَونک اوہ کِدھرے سَیدو؟''
دِل تے کیتا آکھاں 'واہ واہ گولیاں پُھریاں صاحبزادِئیے
گِلڈ کیہ ٹی وی تکمے نشان ایوارڈ مناسب نوکریاں کیہ'
پر بحث مُدَپّا ایہناں لوکاں نال اوہا دانے لاوندے نی شپیا
جیہناں کم کڈھاونے ہوون
پھپھے کُٹناں ساڈے جیہیاں تے ہوں ہاں کر سُن گِننا ای ہویا
''وِچوں شعر کتُوریاں دے کُجھ بچ وی گئے سن سَیدو
تینوں تے پتہ ای اے
ہوئے وڈیرے جس ویلے، ہلکاء کُد گیا،
پھیر گولی دُوئی چلاونی پئی،
جِتھے وی ڈِھل ملی اے نا ایہناں مُلک شہر ہلکا چھڈے سن،
مِل چھڈیا کر سیدو
بڑا حوصلہ ہوندا ای تل وطنیاں نال گھڑی گل کر کے''
ہُن فیشن پریڈاں لاوندی او مَوڈل چھنڈ چھنڈ کے
ناں تے بناوندی اے اوتھوں اگے ویچن لئی،
شوقیہ کم نہیں ایہناں دا کوئی ہوندا شپیا
ناں ناواں اے ناواں ناں اے
ڈھائی آنے دا ہووے بھاویں
اوہا توِیت اَٹھرائِیاں نوں ڈِھڈ کرا جاندا اے،
اِنجے ای ساک شریکے ایہدے
یورپ امریکے
ورھیو ورھے ایوارڈ پریڈاں لائی آوندے نیں،
چنگے بھلے سیانے ہُنڈری
لگ لائین
ہو اِنقلابی شعر کتُورے گل وِچ پٹے پواؤندے نی