''ہا بوری وِچ کیہ بھرایا ای اج یار''
''کاغذ وادھو،
کول کیہ رکھنے،''
''کیوں، سَو کم آؤندے نیں''
''کیہ خبر وِچ ہووے کوئی
لِکھ لِکھ کٹیا وِچوں وِچوں چِٹ کورا
مِٹی خورا،''
''تے ہا فصیل کتاباں دی جیہڑی اپنے دوالے تُوں چڑھائی بیٹھا ایں
وِچ سکندر ہِٹلر کئیں
صُوف صاف عُلماء سِدھ سادُھو
وِچے قلندر کَٹ وڈھ نانگے
اوہ وی جیہناں کول کالا پِیلا لال بدامی جادُو
بوری بند کیویں کرنے نی''
''ایہہ کتاباں اساں تے نہیں نا لِکھیاں یار،
وِکدیاں لئیاں نیں
سیکنڈ ہینڈ وی نویاں وی''
''تے کیہ خیال اے
بوری بند کر کڈھیا وِکنوں رہ جانائے؟''
''کیہ پتہ سی آ توں کھیہڑے پے جانائے،
ایویں خیال ایہہ آؤنداے یار
کٹ وڈھ جیہڑا سٹیا اے
اوہ نہ ہو جائے پُرجا پُرجا
اُٹھ ٹُر پئے
لڑن دِین1 کے ہیت''
''ایہہ خیال کبیر نوں کیوں نہ آیا''
''اوہ کِسے دی کَھڈی چلاوندا ہا
اسیں کِسے کولوں چلوانی اپنی گَڈی ہوئی''
1- دِین= کنگال، مَل ہِین-