کندھ میرے اندر دی
چھت سجری چوئی دیاں لاراں
اِٹاں دیاں جوڑاں چوں
پُھلیائے کلر نرویا
پچھلیاں ڈَب کَلیاں دے لے پاڑدا چڑھیائے
وچ کلا کاڈھا وگیائے ٹور اسوار دی
آپنی جوہ دا سائیں کوئی خان شہانا
اچیتی کلر چوں
مدھرا جیہا چھی پیرا پیلا سریائے
کاڈھے اگے سمجھو بَونا
چلو ایہنوں بھَمبیرا آکھو
کاڈھے دوالے بھنویائے موکلا
کاڈھا اجھکیائے: ''کمی سوالی کیہڑائے''
بھمبیرے سوڑا کر لیائے گیڑا
کاڈھا گجیائے: ''کیہ کرنائیں اوئے‘ مرنائیں''
گیڑ بھمبیرے دا
ہو گیائے زور تِکھیرا
کُھچیں کھیہندا اے
چھتھا کاڈھا الف تھیائے جیوں جنگیں گھوڑا
گیڑ بھمبیرے دا
ان دِسنی کوئی لِشک مریندائے مارو
ہتھیار پیا کوئی ٹسٹ کریندائے
الف کھلوتا کاڈھا تھاں تے آکڑیائے
سُنگھدا اپر چڑھیائے بھمبیرا
کاڈھی سِری نال تُھنی لا کے
چھیک بِنا ای وچوں مِکھ پیا چُنگھدا اے
کاڈھا سوں گیائے
مارو لِشک دا چُٹیا سمجھو ٹینک جَھوں گیائے
کوہاں کِھلری جوہ نوں اک پل دھیانناں
مڑ ویہناں
نہ کاڈھا نہ اُتھاں بھمبیرا
دور دور تائیں پسری سُنج اے
کائی بھمبیرا ڈائن آہی
وہیر ترٹا پاندھی چَٹ کے چھائیں مائیں ہو گئی
کائی ان بھول سوانی آہی وچوں کاڈھا‘
مال لبیڑی چِھک مردانی
اوہنوں جھلیڈے رُوپ چُوپ کے کلر کر گئی
یاں میری نیجھ دا اک پل کھنجیا اوہناں نوں صدیاں ہوئیاں
کالیاں جُسیاں دا
متے بھمبیرا آہا وپاری
بے دھیانا کلا بانھا نپ کے
ٹِھل گیائے امریکے
کالے ماس وچوں
ہن پُھٹی کِھڑسی اوتھے
یاں دند کھنڈ دا ٹھیکیدار بھمبیرا
وگ وچھڑیا ہاتھی گھیر کے جھٹ پٹ کوہن لے گیائے
ہن جا جپان فرانس جرمنی دند کناں وچ کِھڑسن
یاں بھمبیرا نیل مسالہ ریشم ململ ونج وہاجن آیائے ہندستانے
ٹَھپ دیسی شاہیاں پُھلیاں کچھے مار گیائے
متے ویہویں صدی دا انت آ گیائے
جگت مہاجن شاہ بھمبیرا
مُلکھ نویں وکھرپ اکڑائے لیر لیر قرضائے
جوڑ کڑکی قرقی لے گیائے اکھ پلکارے
یاں مڑ ہوئے نہ ہوئے
کاڈھا تے بھمبیرا دوئے کلر دے ونجارے
کلر ویچن لڑدے لڑدے سالا تے بھنویا
خار بخاریں ودھ ودھ گھٹدے
کلر نال ای رل گئے
کلر کھاندے کلر ہگدے سارا کلر کر گئے
ہوئے نہ ہوئے سبھ صلح صلاحیں ہویائے
لڑدیاں لڑدیاں
اچن چیت بھمبیرے اُتے جُھٹ اداسی کیتائے
کاڈھے دی اوس ہلمٹ چھیکی پیچ کناں دے کھولے:
''سُن میاں کاڈھا
اوجھڑ ڈاڈھا
تیں میں دے وس ناہیوں
تیں میں آپنی میر ویاہونے
تیر نوں کھاوت میر جماونے
ہوئے آں کلے تاہیوں
اک کم رل کے کرئیے
ایہہ کھیڈ کوئی جت نہیوں سکدا
آ ہُن دونویں ہرئیے
من جائیے اساں جیوں نہیں سکدے
پِڑ چھڈ جائیے- مرئیے-''
چلو چھڈو شاہ جی رہن دیو
کندھ کُھرچا کے پینٹ کرا لؤ
شاعری وچ نہیں چلدیاں اخباری گلاں