فرید بھنڈار

نقلی جھیل کنارے

نقلی پہاڑی اُتے نقلی چِیلاں

اصلی اصل پہاڑاں اپر ہوندیاں نیں

ترکِھیاں ڈھکِیاں اپر پب دھر مُدتاں تِھیں تَن کَھلیاں

لنگھدی واء نوں ساہ سُگندھ سنیہا دے بُن ٹوردیاں

دیسوں کڈھ پردیسیں گڈیاں

ساہ گُھٹ کھلیاں جھوردیاں

بال دو آئے نیں

نِکڑُو چھیاں ستاں دا ہیٹھ کھلو گیائے جھیل کنارے تھیلا دھر کے

وڈڑا دساں باراں دا چیل دے اپر چڑھیائے

نِکے نِکے ہتھ پیر بنا کے پنجے

لَوِیاں ٹہنیاں تھم پلمدا تھیائے اُچیرا

سریاں اُتے پَھل چِیلاں دے

لکڑ پیالے سَکھنے

چمچیاں ورگیاں لکڑ انگلاں نال بھرے

بال اوہناں ول اُلردائے

اوہ ڈِگیا کہ ڈِگیا

دل میرا سوڑا پیندائے

ڈِ گا تے میں کُجھ کر نہیں سکناں

اُٹھ ای کھلوواں ایتھوں

مگروں کرے جو کرنائے

تھلڑی لَوِی ٹہنی نوں پیر دے بھار لِفا کے ویہندائے

سہہ جاسی؟

اُپرلی ٹُمب ٹوہندائے

اُڑاں تاں ہتھ وچ رہ جاسی؟

سنبھل جُھٹدائے سنبھل گُھٹدائے

بھار برابر اپنا رکھ کے

پَھل مرُنڈ کے تھلے سُٹدائے

نِکڑُو نچدا ٹپدا آ کے پَھڑ جھولے وچ دھردائے

وڈڑا اک ٹا ہنی توں دُوجی سردا

لمک ولاندا تول وساہندا

اُپّر دُھر اُپّر

لِفدِیاں نال لِف جُھولدا

جُھولدِیاں نوں تھمدا

اُپّر دُھر اُپّر

پَھل مروڑ کھوہ ہیٹھ وگائی آوندا اے

سوچناں آکھاں نا ہُن بس کر ڈھیر نیں اتنے؟

مُڑ سوچناں واج میری نال دھیان نہ تِھڑ جائے ایہدا

''بوتل پیسو فانٹا کوک سَیون اپ''

جھیل والی کینٹینوں آیا پُچھدائے مینوں

ایہہ بال کیہ کرسن ایہناں لکڑ گُچھیاں نوں میں پُچھناں اوہنوں

''ساڑسن ہور کیہ بالن چنگائے''

''کسے دوا وچ پیندے ہون متے؟''

''نہیں ہُن اوہ دوائیاں کم نہیں کرینیاں''

''ڈھے نہ پوے''

“ایہہ باندر نیں پہاڑ نے کُجھ نہیں ہونا ایہناں کی چھوڑو

فانٹا کوک کہ سیون اپ''

''رہن دیو''

اِک چِیل دی دَھون توں اُلّر دُوجی چیل دی کنڈ تے کِھسک گیائے

بال وڈیرا

مالی گھا کھوتر فُٹ پاتھ سواردا سرکیائے نیڑے

میں پُچھناں ایہہ چودھری بی اے ایہناں چِیلاں دا

جیہڑا بال پئے لاہوندے نیں؟''

''چیل میاں جی پہاڑ دا جی اے بی ایہدا نہیں ہوندا''

''اُگدا کیویں اے؟''

''قلماں لاوندے ہونے نیں ہور کیہ''

رَنبی چلیندا اگانہہ رَمَک گیائے مالی

پَھل میرے پیریں ڈِگائے

نِکُڑو بھجدا آیا اے

میں کول بہایائے

''کیہ کرسو ایہناں دا؟''

''اِسنی بننی اے ڈیکورَپشن

میزاں اپر سجاوٹ کرنی اے''

''ڈیکوریشن'' میں سمجھاوناں

''نہیں، ڈیکورپشن''

اوہ نِکا جیہا مونہہ بھر کے

نِکیاں نِکیاں بِلیاں اکھیاں پھیر کے میری غلطی کڈھدائے

''بڑے بہادر او تُسیں''

''میں نہیں اوہ بہادر اے

میں تے ڈرنا

ڈرنا اوہ بھی اے نہ ڈرے تے ڈھے پئے''

''کیہ مِلدائے تہانوں ایہناں دا''

''ترے چار رُپیئے اِکی پَھل نے مہنگی وِکنی اے ڈیکورپشن

پنج سو نی پنج ہزار نی وی

''ایہہ پَھل اے چیل دا؟''

پَھل نا چھلُڑ، اِس بِچ تِلخو ہونے نیں

''تِلخُو ؟''

تِلخُو بی اے، کچے بِچوں دُدھ نِکلنائے بہوں خشبوئی آلا،

روغن بننائے

پک کے کُھلنائے پَھل تے تِلخُو کِھلرنے نیں، مزا دینے نیں''

چکھاؤ مینوں وی

''تکنے رہو بہارے پکسن، کچے کی نہ اساں تروڑنے''

اپروں چِھلڑ آیائے

نِکڑُو ڈھل گیائے چاون ٹپدا نچدا