پُتر نہ سُکھن ماواں
جد تائیں پُتر نہ سُکھن ماواں
ٹھار نہیں پَینی پانی نوں
نہیں پَینیاں رُکھاں نوں چھاواں
پُتر نہ سُکھن ماواں جد تائیں
بُھکھ ڈِھڈاں وچ پَلدی رہسی
روح بندے دا چَٹدی رہسی
سِینے پتھر پَیراں ہیٹھ چُپِیتے پیلے ہوسن پئے
جَمدیاں کانیاں ہوسن فَصلاں دِلاں دِیاں
گھڑن سوارن ہار' اُگاون ہار رزق دے
ہَردے رہسن
ودھدے رہسن جال وچھاون والے
ڈوراں تُنکن والے
کیہڑا اُٹھ تروڑے جپھے مالکِیاں دے
صدیاں بدھی گہنے پئیاں جِنداں آ چُھٹکارے
پُتر نہ سُکھن ماواں جد تائیں
چھیکے لیکھے جوڑن لئی
گئیاں نوں موڑن لئی
ککھ سہیڑ کے دھواں دھرے بنیرے کون
سانجھے دُکھ دی اروڑی تھاں تھاں کیرے کون
چڑھدی رُت دیاں گنڈھاں گھر گھر پھیرے کون
کون ونڈے کستوری
نویاں عشقاں دی
کون کہانی تورے
جد تائیں پُتر نہ سُکھن ماواں