فرید بھنڈار

پہلی کلی

ویلا: بارھویں صدی دا دُوجا ادھ،

ہندوستان وِچ تُرک بادشاہی، تخت دِلّی،

بادشاہ واہی واناں کمیریاں دی کیتی اُپّج دا چوکھا حصہ فوج تے افسراں راہیں اُگراہ کے خزانے وِچ رکھ گِھنیندے نیں تے اوہدے سِر تے فوجاں ودھاوندے تے اپنا راج گُھکاوندے نیں پئے-

تھاں: ستلج نَیں دی کندھی اُتے اِک شہر اجودھن (جیہڑا ہُن پاک پٹن اے)- شہروں باہر فرید دا ڈیرا- فرید نَویاں ورھیاں دے ہو گئے نیں - ساری عمر لوکاں نوں جیون دا تت سمجھاون تے سہج دا جیون جی وکھاون وِچ لنگھائی نیں - کوئی مَل مالکی نہیں - ہر رنگ دے مال منال نوں تجیونیں - ہر رنگ دے سرکاری اُمرائی تھاپڑے نوں پرے رکھیا اے-

ماڑے تگڑے لوک ہر جات تے مذہب دے آوندے نیں دینہہ پر رات- آپنیاں اوکڑاں پواڑیاں دا اُپا پچُھدے نیں - ڈھیر نذر نیاز اکٹھی تھی ویندی اے- نقد وی، جِنساں وستاں وی- شام تائیں ہر شے لوڑ ونداں وِچ ونڈیج ویندی اے- کوئی ذرا جیہی چیز وی رات نہیں رکھی جاندی-

فرید اِک مُرید نال صف تے بیٹھے نیں - تہمت کُڑتا سادہ- سِر تے پٹکا- ایہہ مُرید مہینے توں اوہناں دے کول اے- ہُن وِدیا پیا ہوندا اے- فرید اُٹھے نیں - مُرید نوں سینے لایونیں -

مُرید: دُعا

فرید: (ہتھ چائے نیں) جا، انند مان ہر گھڑی، اکارن انند، ہر پل اکارن انند- (مرید گوڈے چھوہے نیں تے ٹُر پیا اے-)

دُوجی کلی

ویلا: ویہویں صدی دا دُوجا دِہاکا،

راس والی دی چڑھت دا اُلٹاء پیا تھیندا اے- سال پہلوں روس وِچ تھیا اے- ہُن جرمنی وِچ خلقت اُٹھدی اے پئی-

تھاں: جرمنی دے اِک شہر دی جیل- کوٹھڑی وِچ روزا لکسمبرگ لمی پئی سوچدی اے- ادھ چانن ادھ ہنیر- گھنی چُپ چان- ٹھہر ٹھہر کے آوندا پہریدار دیاں بُوٹاں دا واج روڑی دی رگڑ وِچ رلیا- روزا سنتالیاں دی اے- ہُن تائیں سارا ویلا مَل ویہار نوں اُتَھلّ کے کُل جگ اُتے سانجھ ویہار آنن دے آہر وِچ لائیوس- ڈھیر لِکھتاں لِکھیاں نیں - اُتھلکار جُوڑی1 جوڑن دا جتن کیتا اے، دینہہ رات-

روزا: ہنیری رات اے- سِنھا اِکلاپا- میں ایس کال کوٹھری وِچ پئی ہوئی آں - تیجا ورھا اے جیل وِچ- پتھریلا فرش اے، تھلے- بھو دا ستھر- پر عجیب سرور اے، اچرج ترنگ ہمیشہ وانگ، اِک پل وی واندا نہیں - کیہ بھیت اے ایس اکارن انند دا- خبرے…… کیہ…… لگدائے جیون آپ ای کارن اے……

1- جُوڑی= پارٹی-