اُچیاں کچیاں کندھاں
ترَے جیلاں دِیاں
مُکن جِتھوں کندھ ٹُردی اے اوتھوں پکّی
پاگل خانے والی،
جیل زنانی، جیل ایانی، سنٹرل جیل سیانی
سڑک ہے جیل روڈ
جِتھے اساڈا گھر ہے
کِسے اوس دا جیہڑا ٹُر گیا اودھر
خالی کر اساں ایدھر اُٹھ آیاں لئی،
اُچیاں کچیاں کندھاں
کِتے کِتے وِچ تھاں اے اُپر
جِتھوں سپاہی ٹنگے
اندر باہر تکدے نیں ہیٹھاں
راتیں واجاں چِیکاں دِیاں وی آوندیاں نیں
رَلیاں پہرے دِیاں نال
گھنٹے ادھے گھنٹے
تِن گھڑیال کھڑکاؤندے نیں
آپو اپنے سُر وِچ
سُر زنانہ نِیواں ایانا اُچا
اگوں پھیر سیانا نِیواں،
کدیں ورھے چھماہی اِکو ساہے وجی آوندائے گھڑیال
آہندائے دوڑو سپاہیو
قیدی متا پئے کوئی پکاؤندے جے کندھاں سَنھ نِکلن دا
اوہ نہیں سچ
آپو وِچ بِھڑ پئے جے
دوڑو سپاہیو تاڑو وکھ وکھ کر کے،
سپاہی اِک رِٹائر مالی ساڈا اے
آہندائے ساڈے ای وِچوں نیں قیدی وی کہ
بس اِک وردی ہور اے
روزی اوہناں لوائی ہوئی اے ساڈی وی اپنی وی،
کم اسیں سِکھلاونے آں اوہناں نوں
چکّی چلاون دا
اپنا اوہناں دا اَنّ پیہائی آونے آں،
قلِین اُناون پلنگھ رنگاون دِسیدائے اُتلیاں جوگا،
ساڈے وِچوں ای نیں اوہ وی وِرلے
گھڑی وکھ ہو سُولی چُم چڑھدے نیں جیہڑے
اُتلی ہیٹھاں کرن لئی
اِک رنگ کر کے سبھ نوں جیوندیاں مرن لئی