فرید بھنڈار

]دِیوے دی لوء- نِکا جیہا اندر- چالیہاں پنجتالیاں دی بھاکو بھُنجے وِچھی کھیسی تے لمی پئی ہوئی اے- نظام آیا اے- اُٹھ کے بہہ گئی اے[

بھاکو:  آ گیائیں مِترا لاڈلیا مینڈے پُتر دیا- تینوں ای پئی اُڈِیکدی ہامی- ٹور آیائیں سرکاری سواری، پتہ ای کِتھے گیا اے ملک تینڈا

نظام:   قصور؟

بھاکو:  نہیں، نیڑے اوہدے، پانڈوکے

نظام:   بُلھے شاہ دا دیس

بھاکو:  آہو جِتھے1 جُھوٹھے اج وی پئے کلولاں کردے نیں - بابے نُوں پھاہے لواون دا اُپرالا جیہناں کیتا، تے سچے اج وی گردناں مرواون لئی اُٹھدے نیں پئے

نظام:   کون لوک نیں ایہہ بھاکو ماسی- اگے وی اِک واری کُٹ کھادی نیں سرکاری فوج کولوں ہُن وت ساہویں پئے ہوندے نیں -

-1 بُلھا قصر قصُور ہے جِتھے مُونہوں نہ سکن بول- اُتھ سچے گردن مارئیے جُھوٹھے کرن کلول (دوہڑا)

بھاکو:  مِلیں تے جانیں - پر تُوں تے ادھی راتیں اُٹھ کے سرکاری گھوڑیاں دِیاں نعلاں ٹھوک ٹھوک کُٹ وِچ اپنی بھاجی پیا رلاونا ایں - مِلیں اوہناں نُوں کیویں

…… چُپ کیوں کر گیائیں ……

نظام:   گل تینڈی نے بھاکو ڈھکن پُرانا لاہ سٹیا اے- اندر اپنا مینوں پیا ہُن دِسدا اے…… میں ہُن گھر نہیوں جاناں

بھاکو:  تے کِتھے جانا ای

نظام:   پانڈوکے

بھاکو:  کیہدے کول

نظام:   تینڈے کول

بھاکو:  ہاں میں اوتھے، مِلساں تینوں پرنیتو ہو کے

نظام:   تُوں سُوجھے نال ایہہ گل نہیں کیتی؟

بھاکو:  مینڈی گھٹ ای سُنی اے اوہنے، پیو اپنے دی بُہتی- اوہ مویائے جدوکا، ایہہ پیو بن اپنا گُھوریاں مینڈے ول سٹدا رہندا اے-

نظام:   ویکھنے آں - میں ہُن چلناں

بھاکو:  اُتھاں پرنیتو ای سنگی مینڈی پُرانی- نِت نویں - مِلسیں تاں گل تینوں پُوری دسیسی

(اُٹھ نظام نُوں گلوکڑی پایوس، متھا چُم- نظام ہتھ چُم اوہدے نِکل گیا اے)